فوتو: ازاتتىق راديوسى.

استانا قالاسىندا جۇزگە جۋىق كوپ بالالى انا بيلىك وكىلدەرىنە ارىز-شاعىمدارىن ايتتى.

«استانا» كونتسەرت زالىندا قالا اكىمىنىڭ ورىنباسارى ەرمەك امانشاەۆپەن كەزدەسكەن انالار بەس بالاسى ورتتەن كوز جۇمعان وتباسىنىڭ جاعدايى ءوز باستارىندا دا بار ەكەندىگىن مالىمدەدى. ولار باسپانا مەن بالالارعا تولەنەتىن جاردەماقى ماسەلەلەرىن قوزعادى.

بۇدان بولەك جيىن بەلسەندى توپ وكىلدەرى پرەزيدەنت نۇرسۇلتان نازارباەۆتىڭ اتىنا جازىلعان اشىق حاتتى وقىدى. وندا كوپ بالالى انالار بيلىكتەن «قازاقستاندا ءاربىر بالاعا مىڭ ايلىق ەسەپتىك كورسەتكىش كولەمىندە ءبىر جولعى الەۋمەتتىك كومەك، بالا كامەلەت جاسىنا جەتكەنشە ەڭ تومەنگى كۇنكورىس مينيمۋمى كولەمىندە، ال كىشكەنتاي بالامەن وتىرعان انالارعا ەڭ تومەنگى ەڭبەكاقى كولەمىندە جاردەماقى تولەنسىن» دەگەن تالاپتار قويعان جانە «ءۇش بالاسى بار وتباسىلاردى باسپانامەن قامتاماسىز ەتۋدى، ال ءتورت جانە ودان كوپ بالاسى بار وتباسىلارعا تەگىن باسپانا بەرۋدى» تالاپ ەتكەن. حات اۆتورلارى بيلىك وكىلدەرىنە قويعان تالاپتارىنىڭ قارالۋىنا جەتى كۇن ۋاقىت بەرگەن.

انالار ماسەلەسىن تىڭداعان قالا اكىمىنىڭ ورىنباسارى ەرمەك امانشاەۆ قويىلعان تالاپ-تىلەكتەردىڭ بارلىعى «زاڭ جۇزىندە قاراستىرىلاتىنىن» مالىمدەدى.

اقپان ايىنىڭ 3-ىنەن 4-ىنە قاراعان ءتۇنى استانا قالاسىنىڭ كوكتال-1 ىقشام اۋدانىندا جەكە تۇرعىن ءۇي ورتەنىپ، سالدارىنان ءبىر وتباسىنىڭ بەس بىردەي ءبۇلدىرشىنى كوز جۇمعان. كەيىننەن بۇل وقيعا حالىق اراسىندا قىزۋ تالقىلانىپ، جۋرناليستەر مەن ازاماتتىق بەلسەندىلەر الەۋمەتتىك جەلىلەردە ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆانىڭ وتستاۆكاعا كەتۋىن تالاپ ەتكەن.

"The Qazaq Times"