اقش بيلىگى ۆەنەسۋەلانىڭ مۇناي-گاز كومپانياسىنا سانكتسيا سالماق

اقش بيلىگى ۆەنەسۋەلالىق PDVSA (Petroleos de Venezuela) مۇناي-گاز كومپانياسىنا قارسى سانكتسيا سالۋعا دايىندالۋدا. بۇل تۋرالى اق ۇيدە وتكەن ءباسپاسوز-كونفەرەنتسياسى كەزىندە اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى جون روبەرت بولتون (John Robert Bolton) جانە قارجى مينيسترلىگىنىڭ باسشىسى ستيۆەن منۋچينا حابارلادى.

منۋچينانىڭ سوزىنشە، اتالعان سانكتسيا PDVSA كومپانياسىنىڭ بارلىق اكتيۆتەرىنە شەكتەۋ قويماق. سونىمەن قاتار، سەرىكتەستىك تانىتقان وزگە دە شەت ەلدىك كومپانيالاردىڭ ارى قاراي جۇمىس جاساۋىنا تىيىم سالماقشى.

وسىدان كەيىن، جون بولتان لاتىن امەريكاسىندا بولىپ جاتقان وقيعاعا بايلانىستى نيكولاس مادۋرو ۆاشينتوننىڭ الدىندا ءوزىنىڭ لەگيتيمدىلىگىن جوعالتقاندىعىن حابارلادى. بۇدان بولەك، امەريكا قۇراما شتاتتارى ۆەنەسۋەلانىڭ ۋاقىتشا پرەزيدەنتى حۋان گۋايدونى قولدايتىندىعىن جەتكىزگەن.

ەستەرىڭىزگە سالا كەتەيىك، كاراكاستاعى بيلىككە قارسى ميتينگ بارىسىندا ۆەنەسۋەلانىڭ ۇلتتىق اسسامبلەيا باسشىسى حۋان گۋايدو ءوزىن ۋاقىتشا پرەزيدەنت رەتىندە جاريالاپ، انت قابىلداعان بولاتىن. ال، گۋايدونى ەڭ العاش پرەزيدەنت رەتىندە مويىنداعان دونالد ترامپتىڭ مالىمدەمەسىنەن كەيىن، نيكولاس مادۋرو اقش ەلىمەن بارلىق قارىم-قاتىناستىڭ ۇزىلگەندىگىن ايتىپ، امەريكانىڭ ۆەنەسۋەلاداعى ديپلوماتيالىق وكىلدەرىنە شەكارادان شىعىپ كەتۋ ءۇشىن 72 ساعات ۋاقىت بەرگەن.  .

قازىرگى تاڭدا نيكولاس مادۋروعا قىتاي، رەسەي، تۇركيا سىندى مەملەكەتتەر قولداۋ بىلدىرۋدە. سول سەكىلدى رەسەيدىڭ اسكەري جاساعى دا مۇحيت اسىپ ۆەنەسۋەلا ماڭىنا جينالدى.

2018 جىلدىڭ 20 مامىرىندا ۆەنەسۋەلادا كەزەكتەن تىس پرەزيدەنت سايلاۋى ءوتتى. داۋىس بەرۋ قورىتىندىسىنا ساي، نيكولاس مادۋرو ءوزىنىڭ پرەزيدەنتتىك لاۋازىمىن تاعى دا 6 جىلعا ۇزارتقان. ال، 2019 جىلدىڭ 10 قاڭتارىنان باستاپ مادۋرونىڭ جاڭا مەرزىمى باستالۋى ءتيىس ەدى. بىراق، لاتىن امەريكاسىنىڭ بىرنەشە ەلدەرى مەن كانادا سايلاۋدىڭ حالىقارالىق ستاندارتقا ساي وتپەگەندىگىن مالىمدەدى. وسىدان كەيىن ۆەنەسۋەلادا حالىق پەن بيلىك اراسىنداعى قاقتىعىس ورىن الدى. 23 قاڭتار كۇنى باستالعان نارازىلىق شەرۋدەن 20-دان استام ۆەنەسۋەلا ازاماتى قازا تاپقان.

"The Qazaq Times"