اقپارات جانە كوممۋنيكاتسيالار ءمينيسترى داۋرەن اباەۆ. فوتو: راديو ازاتتىك

الەۋمەتتىك جەلىلەردى باقىلاۋ ادام قۇقىعىن شەكتەمەيدى.

اقپارات جانە كوممۋنيكاتسيالار ءمينيسترى داۋرەن اباەۆ قازاقستاننىڭ الەۋمەتتىك جەلىلەرگە باقىلاۋ جۇرگىزۋگە قاتىستى رەسەيدىڭ «كۆانت» عىلىمي-زەرتتەۋ ينستيتۋتىمەن اراداعى بايلانىسىنا قاتىستى پىكىر ءبىلدىردى.

مينيستر مىرزا جۋرناليستەردىڭ: «الەۋمەتتىك جەلىلەردى باقىلاۋ ادام قۇقىعىن، ازاماتتاردىڭ اقپارات الۋ قۇقىعىن شەكتەمەي مە؟» دەگەن سۇراعىنا: «شەكتەمەيدى، اڭدۋ، باقىلاۋ بولمايدى» - دەپ قىسقا عانا جاۋاپ قاتتى.

بۇدان بولەك ول قازاقستاندىق باق-تا قىزۋ تالقىلانعان رەسەيدىڭ «كۆانت» عىلىمي-زەرتتەۋ ينستيتۋتىنا قازاقستان بيلىگىنىڭ الەۋمەتتىك جەلىلەردى باقىلايتىن قۇرىلعىلارعا تاپسىرىس بەرگەندىگى جونىندەگى اقپاراتقا جاۋاپ بەردى. بىراق بۇل جەردە دە اباەۆ مىرزا قىسقا دا نۇسقا جاۋاپ بەردى. ول ءوز سوزىندە «اقپارات جانە كوممۋنيكاتسيالار مينيسترلىگى رەسەيلىكتەرمەن ەشقانداي بايلانىس ورناتپاعاندىعىن» ايتىپ، جالپى، الەۋمەتتىك جەلىلەردى باقىلاۋ حالىقتىڭ نارازىلىق كوڭىل كۇيىن انىقتاۋ ءۇشىن ەمەس، زاڭعا قايشى ماتەريالداردىڭ جاريالانىپ كەتپەۋىن قاداعالاۋ ءۇشىن قاجەت ەكەندىگىن جەتكىزدى.

ەستەرىڭىزگە سالايىق، وتكەن اپتادا «Digital Revolution» توبىنىڭ حاكەرلەرى رەسەيدىڭ فەدەرالدى قاۋىپسىزدىك قىزمەتىنە تيەسىلى «كۆانت» عىلىمي-زەرتتەۋلەر ينستيتۋتىنىڭ كومپيۋتەرلەر جۇيەسىن بۇزعاندىعىن مالىمدەگەن. ولار تاراتقان قۇجاتتا اتالعان جۇيە نەگىزىنەن الەۋمەتتىك جەلىلەردەگى نارازى توپتى انىقتاۋمەن اينالىساتىندىعى كورسەتىلگەن. «Digital Revolution» وكىلدەرى رەسەيلىك باقىلاۋ جۇيەسىنە قازاقستاننىڭ دا تاپسىرىس بەرگەندىگىن اتاپ وتكەن. BBC اقپارات اگەنتتىگىنىڭ مالىمەتىنشە، قازاقستاننىڭ اقپارات جانە كوممۋنيكاتسيالار مينيسترلىگى اتالمىش جۇيەنى ساتىپ الۋعا 4,3 ملن دوللار قارجى بولگەن.

"The Qazaq Times"