ەلەكتر ەنەرگياسىنىڭ باعاسى 25 پايىزعا ارزانداماق.

26 قاراشا كۇنى وتكەن ۇكىمەت وتىرىسىندا ەنەرگەتيكا ءمينيسترى قانات بوزىمباەۆ تاريفتەردى ارزانداتۋعا بايلانىستى پرەزيدەنت تاپسىرماسىنىڭ ورىندالۋ بارىسىنا توقتالدى.

«ەلەكتر ەنەرگياسى تاريفتەرىنىڭ 25 پايىزعا ارزانداتۋعا بايلانىستى مينيسترلىك باستاماسى كونتسەپتۋالدى قولداۋعا يە بولدى. ءبىز وسى اپتانىڭ سوڭىنا دەيىن ارزانداتىلعان تاريف باعاسىن بەكىتۋدى كۇتىپ وتىرمىز. بۇل جەلتوقسان ايىنان باستاپ ورتالىقتاندىرىلعان ساۋدا جۇيەسىن قۇرۋعا سەپتىگىن تيگىزەدى. ساۋدا ناتيجەسى بويىنشا، ەلەكتر ەنەرگياسىن وندىرۋشىلەر تاريفتەر باعاسىن بەلگىلەيتىن بولادى» - دەپ مالىمدەدى بوزىمباەۆ.

بۇعان دەيىن پرەزيدەنت نۇرسۇلتان نازارباەۆ قاۋىپسىزدىك كەڭەسىنىڭ وتىرىسىندا كوممۋنالدى قىزمەت تاريفتەرىن ارزانداتۋعا بايلانىستى تاپسىرما بەرگەن. ايتا كەتەتىن ءبىر جايت، وسىدان ءبىر جىل بۇرىن پرەزيدەنتتىڭ ءوزى تاريفتەر باعاسىن قىمباتتاتۋ كەرەك ەكەندىگىن ايتقان. ساراپشىلار پىكىرىنشە، نازارباەۆ تاريفتەر باعاسىن ارزانداتۋ، 7-20-25 تۇرعىن ءۇي باعدارلاماسىن ەنگىزۋ ارقىلى الدا كەلە جاتقان پرەزيدەنت سايلاۋىنىڭ العىشارتتارىن جاساۋدا.

قازاقستاندا زاڭ بويىنشا پرەزيدەنت سايلاۋى 2020 جىلى ءوتۋى ءتيىس. بىراق ساراپشىلار مەن جۋرناليستەر قاۋىمى پرەزيدەنت سايلاۋى 2019 جىلى مەرزىمىنەن بۇرىن ءوتۋى مۇمكىن دەگەن بولجام ايتۋدا.

جالپى، تاۋەلسىز قازاقستان تاريحىندا پرەزيدەنت سايلاۋى 2005 جىلى ءبىر-اق رەت ۋاقىتىندا وتكەن. قالعان جىلداردىڭ بارلعىندا ءتۇرلى سىلتاۋلارمەن مەرزىمىنەن بۇرىن بولعان.

"The Qazaq Times"