«يسلام مەملەكەتى» تەررورلىق ۇيىمىنىڭ سودىرلارى تاجىكستانداعى تۇرمەلەردىڭ ءبىرىن «قانعا بويادى».

تاجىكستاننىڭ سولتۇستىگىندەگى حۋدجاند قالاسىندا ورنالاسقان تۇزەتۋ مەكەمەسىندە بولعان بۇلىك سالدارىنان ەكى وفيتسەر، ءبىر كالونيا قىزمەتكەرى مەن ارنايى جاساق ساربازى جانە 25 جازاسىن وتەۋشى كوز جۇمدى.

جەرگىلىكتى باق وكىلدەرىنىڭ مالىمەتىنشە، بۇلىكتى «يسلام مەملەكەتى» تەررورلىق ۇيىمىنىڭ قۇرامىندا بولعان سوتتالۋشى باستاعان. ول قاراۋىل اۆتوماتىن تارتىپ الىپ، كۇزەت اكىمشىلىگىنە قاراتا وق جاۋدىرىپ، كالونيانىڭ ءبىر كورپۋسىن باسىپ العان. كەيىننەن سوگدي وبلىسىنىڭ ىشكى ىستەر دەپارتامەنتىنە قاراستى ارنايى جاساق قىزمەتكەرلەرى بۇلىكتى باسىپ، تۇرمە عيماراتىن كۇشپەن العان.

قازىرگى تاڭدا وقيعا ورنىندا تاجىكستان ادىلەت مينيسترلىگىنىڭ ارنايى كوميسسياسى جۇمىس ىستەۋدە.

"The Qazaq Times"