رەسەي قورعانىس ءمينيسترى سەرگەي شويگۋ سوڭعى جىلدارى سءۇرياداعى سوعىس قيمىلدارىنا قاتىسىپ جۇرگەن رەسەيلىك اسكەريلەردىڭ وپەراتسيالارىنىڭ ناتيجەسى تۋرالى ەسەپ بەردى. ونىڭ سوزىنشە، «يسلام مەملەكەتى» ەكسترەميستىك توبىنىڭ سءۇرياداعى «باندالىق قۇرىلىمدارى» جويىلعان.

«وپەراتسيالار كەزىندە بارلىعى 87,5 مىڭنان اسا سودىر جويىلىپ، 1411 ەلدىمەكەن جانە ءسۇريا تەرريتورياسىنىڭ 95 پايىزدان كوبى ازات ەتىلدى» دەگەن شويگۋ.

ءمينيستردىڭ ايتۋىنشا، ءسۇريا تۇرعىندارىنىڭ 90 پايىزدان استامى تۇرىپ جاتقان تەرريتوريانى سۇريالىق ۇكىمەت باقىلاۋىندا ۇستاپ وتىر. بىراق شويگۋ ءسۇريادا قانشا رەسەيلىك اسكەري قىزمەتكەردىڭ قازا تاپقانى تۋرالى ەشقانداي مالىمەت كەلتىرمەگەن.

رەسەي سۇرياداعى اسكەري وپەراتسيالارعا 2015 جىلدان باستاپ رەسمي تۇردە قاتىسا باستاعان.

رەسمي دەرەكتەر بويىنشا، ءسۇريادا 2015 جىلدان بەرى 91 رەسەيلىك اسكەري اجال قۇشقان. سونىڭ اراسىندا 39 ادام بيىل ناۋرىزدا اسكەري-كولىك ۇشاعى اپاتقا ۇشىراعاندا مەرت بولعان. بۇل تەك رەسەيلىك قارۋلى كۇشتەر قىزمەتكەرلەرىنە قاتىستى دەرەكتەر. سۇرياداعى سوعىسقا جەكە مەنشىك اسكەري توپتاردىڭ قۇرامىندا قاتىسقان رەسەيلىكتەر تۋرالى مالىمەت بۇل ەسەپكە ەنبەگەن.

"The Qazaq Times"