فوتو: Oxu.az

گرۋزيا رەسەيدەن ابحازيا مەن وڭتۇستىك وسەتيادان اسكەرىن شىعارۋدى تالاپ ەتتى.

اقش-تىڭ نيۋ-يورك قالاسىندا وتكەن بىرىككەن ۇلتتار ۇيىمى باس اسسامبلەياسىنىڭ 73 وتىرىسىندا گرۋزيا پرەمەر-ءمينيسترى رەسەيگە قاراتا مالىمدەمە جاسادى. وندا ول: «ءبىز وسى ۋاقىتقا دەيىن وزىمىزگە جۇكتەلگەن بارلىق حالىقارالىق مىندەتتەردى ورىنداپ كەلدىك. ال رەسەي حالىقارالىق كەلىسىمدەردى ورىنداپ وتىرعان جوق. سول سەبەپتى ءبىز رەسەيدەن ابحازيا مەن وڭتۇستىك وسەتيادان وككۋپاتسيالىق كۇشتەرىن شىعارۋدى تالاپ ەتەمىز» - دەپ مالىمدەدى.

ەستەرىڭىزگە سالايىق، رەسەي اسكەرىن گرۋزيانىڭ ابحازيا جانە وڭتۇستىك وسەتيا اۋماعىنا 2008 جىلى كىرگىزگەن. ءدال وسى جىلدىڭ 16 تامىز كۇنى گرۋزيا، رەسەي، ابحازيا جانە وڭتۇستىك وسەتيا باسشىلارى بەيبىت كەلىسىمگە كەلۋ تۋرالى قۇجاتقا قول قويدى. ارادا ون كۇن وتكەن سوڭ رەسەي ابحازيا مەن وڭتۇستىك وسەتيا تاۋەلسىزدىگىن مويىندادى. كەيىننەن قىركۇيەك ايىنىڭ 2-ءى كۇنى گرۋزيا رەسەيمەن اراداعى بارلىق ديپلوماتيالىق قارىم-قاتىناستارىن بۇزدى.

"The Qazaq Times"