قىرعىزستان پرەزيدەنتى سوورونباي جەەنبەكوۆ تۇركى كەڭەسىنىڭ جانىنان جاستارمەن جۇمىس ىستەيتىن ارنايى حاتشىلىق قۇرۋدى ۇسىندى.

قىرعىزستاننىڭ شولپان-اتا قالاسىندا ءوتىپ جاتقان تۇركىتىلدەس ەلدەردىڭ VI-سامميتىندە قىرعىز باسشىسى جەەنبەكوۆ: «قازىرگىدەي گەوپوليتيكالىق جاعدايدا تۋىستاس ەلدەردىڭ جاستارىن تاريحىن، مادەنيەتىن، ءتىلى مەن باۋىرلاس ەلدەردىڭ سالت-ءداستۇرىن بويلارىنا ءسىڭىرىپ ءوسىرۋ ۇلكەن ماڭىزعا يە. تەك وسىنداي جولمەن عانا جاستاردىڭ راديكاليستەردىڭ تۇزاعىنا تۇسۋلەرىنىڭ نەمەسە جات يدەولوگيالاردى قابىلداۋلارىنىڭ الدىن الۋعا بولادى»، - دەدى. قىرعىز باسشىسىنىڭ سوزىنشە، قۇرىلۋى ۇسىنىلعان حاتشىلىقتىڭ جۇمىسى جاستاردى دا قامتيتىن ينتەگراتسيالىق ءىس-شارالار مەن جوبالاردى دامىتۋعا باعىتتالۋى ءتيىس. س.جەەنبەكوۆ ەكونوميكانىڭ ءارتاراپتاندىرىلۋىنا، كولىك دالىزدەرىنىڭ كەڭەيتىلۋىنە، كاسىپكەرلىكتىڭ دامىتىلۋىنا جانە ينۆەستيتسيالىق كليماتتىڭ جاقسارتىلۋىنا قاجەتتى دەڭگەيدە كوڭىل ءبولۋ كەرەك دەپ سانايدى. «وسىنداي ماقساتتاردا ەكونوميكا مينيسترلەرىنىڭ جۇمىسىن جانداندىرىپ، ەكونوميكالىق ىنتىماقتاستىق جونىندەگى جۇمىس توپتارىن دا دامىتۋىمىز كەرەك» ،  -  دەدى ول.

ودان بولەك، قىرعىزستان تەڭىزگە شىعاتىن مۇمكىندىگى جوق ەل رەتىندە باتىس پەن شىعىس اراسىن تولىق بايلانىستىراتىن ترانسپورتتىق مارشرۋتتاردى دامىتۋعا مۇددەلى. وسىعان بايلانىستى «قىتاي — قىرعىزستان — وزبەكستان» تەمىرجول ماگيسترالى قۇرىلىسىنىڭ جوباسى ۇلكەن ماڭىزعا يە ەكەنىن دە ايتتى.

“The Qazaq Times”