ەكى جۇيە قۇرۋشى بانكتىڭ بىرىگۋ پروتسەسى اياقتالۋعا جاقىن. كليەنتتەردىڭ كوبىسىن بىرىككەن بانك ونىمدەر، قىزمەتتەر مەن سەرۆيستەردىڭ قانداي ءتۇرىن ۇسىنادى جانە ولاردى قانداي جاڭالىقتار كۇتىپ تۇر دەگەن سۇراق مازالاۋدا. Halyk Bank-ءتىڭ بولشەك ساۋدا بيزنەسى دەپارتامەنتىنىڭ باسشىسى دينارا امانباەۆا بۇل سۇراق توڭىرەگىندەگى بارلىق كۇدىكتى جويۋعا تىرىسادى.

ينتەگراتسيا ناتيجەسىندە قازكوممەرتسبانك كليەنتتەرىن قانداي وزگەرىستەر كۇتىپ تۇر؟ سالىمشىلارعا، قارىز الۋشىلارعا، كارتا ۇستاۋشىلارعا كورسەتىلەتىن قىزمەتتىڭ شارتتارى قانداي بولماق؟

  • بۇل ماسەلەدە ءبىز ءۇشىن ەڭ ماڭىزدىسى - كليەنتتەرگە ىڭعايسىزدىق تۋعىزباي ولاردى بانك بولىمشەسىنە كەلۋ، قانداي دا ءبىر قوسىمشا قۇجاتتاردى جيناۋ جانە قول قويۋ قاجەتتىلىگىنەن ارىلتۋ. سوندىقتان، قازكوممەرتسبانك كليەنتتەرىنىڭ قارىزدارى مەن سالىمدارى بويىنشا جانە بارلىق ونىمدەردىڭ اعىمداعى، نەسيەلىك، جيناق شوتتارى حالىق بانككە بۇرىنعى بەكىتىلگەن شارتتارمەن كوشەدى. Qazkom كارتالارى تۋرالى ايتار بولساق، بۇرىنعى شارتپەن بەكىتىلگەن بارلىق تاريفتەر مەن مولشەرلەمەلەر كارتالاردىڭ قولدانىلۋ مەرزىمى اياقتالعانعا دەيىن ساقتالادى، سودان كەيىن بىرىكتىرىلگەن حالىق بانكتىڭ تالاپتارىمەن قايتا شىعارىلاتىن بولادى.

كوپتەگەن كليەنتتەردى تاريف ماسەلەسى قىزىقتىرادى، ءتىپتى كەيبىرەۋلەرى كوميسسيانىڭ مولشەرى وسەدى دەپ تە ايتىپ ءجۇر.

  • ءسىز دۇرىس ايتاسىز، Halyk پەن Qazkom-نىڭ تاريفتىك كەستەلەرىندە ايتارلىقتاي ايىرماشىلىقتار، ۇقساس نەمەسە وزگە وپەراتسيالارىن ورىنداۋ ءۇشىن قولايسىز بولعان كوپتەگەن ءتۇرلى كوميسسيالار بار ەدى. سوندىقتان ءبىز وسى پروتسەستى جەڭىلدەتۋ ماقساتىندا بىرىڭعاي تاريفتىك كەستەنى ازىرلەدىك. بۇل رەتتە، بەلگىلى ءبىر ءتاريفتى كوتەرەتىن بولساق، بۇنى كليەنتتەر دۇرىس قابىلدامايتىنىن ءتۇسىنىپ، نارىقتاعى بار تاريفتەردى قاراستىرىپ، اسا ءتيىمدىسىن نەگىزگە الدىق. سوعان قاراماستان، ءبىز تاريفتەردى بىردەن وزگەرتىپ، ءوسىرۋدى كوزدەمەيمىز جانە بۇل تۋرالى ءبىز سەنىممەن ايتا الامىز. ونىمدەرگە جانە قىزمەتتەرگە جاڭا تاريفتەردى ەنگىزۋ تۋرالى اقپارات كليەنتتەرگە ۋاقتىلى جانە تولىق كولەمدە جەتكىزىلەدى جانە ولارمەن halykbank.kz سايتىنان تانىسۋعا بولادى.

قازكوممەرتسبانكتىڭ قانداي ونىمدەرى حالىق بانككە وتەدى، بىرىككەننەن كەيىن قانداي سەرۆيستەر قولجەتىمدى بولادى؟

  • تاريحقا كوز جۇگىرتەتىن بولساق، حالىق بانكتىڭ جالاقىلىق جوبا قاتىسۋشىلارىنا ارنالعان ونىمدەرى مىقتى، ال قازكوممەرتسبانك اۋقىمدى اۋديتوريا ءۇشىن جۇمىس ىستەدى. سايكەسىنشە، ماقساتتى ونىمدەر جەلىسىنە قوس بانكتىڭ ءبىر-ءبىرىن ءوزارا تولىقتىراتىن ونىمدەرى مەن قىزمەتتەرى كىرەدى جانە بىرىكتىرىلگەن حالىق بانكتىڭ كارتاسى بويىنشا جالاقى الاتىندار ءۇشىن Halyk bank-ءتىڭ بارلىق ونىمدەرى، ال قالعان كليەنتتەرى ءۇشىن ەندى Qazkom-نىڭ قىزمەتتەرى مەن سەرۆيستەرى قولجەتىمدى بولادى. ياعني ۇزدىك شارتتاردىڭ وزىندىك «گيبريدى» بولماق: جالاقى جوباسىنا قاتىسۋشىلارعا جىلدىق 1%-دان باستالاتىن (جتسم جىلدىعى 1,1%) مولشەرلەمەسىمەن، ال قالعان كليەنتتەر ءۇشىن - جىلدىق 7%-دان (جتسم جىلدىعى 24,3%) باستالاتىن كەپىلزاتسىز زايمدار قولجەتىمدى بولادى.

Qazkom-نىڭ كرەديتتىك كارتالارىنا قاتىستى ايتار بولساق، بىرىكتىرىلگەن بانكتە MyCard جانە American Express كارتالارىنىڭ بارلىق جەلىسى سياقتى تانىمال ونىمدەر تولىق ساقتالادى. باستاپقىدا Qazkom-نىڭ كرەديتتىك كارتا ۇستاۋشىلارىنا ارنالعان Homebank Orange باعدارلاماسى Halyk-تىڭ كرەديتتىك كارتا يەلەرىنە دە قولجەتىمدى بولادى. بۇعان قوسىمشا، ءبىز، شىعارىلاتىن كارتالارىمىزدىڭ مارتەبەسىن كوتەرەمىز – بۇدان بىلاي كارتالارامىز ءتيىمدى قىزمەتتەردىڭ توپتاماسىمەن تولىقتىرىلادى (ساقتاندىرۋ، مۋلتيۆاليۋتالىق، نيەتتەستىك باعدارلاماسى جانە ت.س.س.) Visa Gold / MasterCard Gold.

بىرىكتىرىلگەن بانك كليەنتتەرى ءۇشىن نيەتتەستىك باعدارلاماسىنىڭ ءورىسى دا كەڭەيە تۇسپەك. بىرىكتىرىلگەن بانك كليەنتتەرىنىڭ ناقتى قالاۋىنا بايلانىستى جاستارعا، ساياحاتتاۋشىلارعا، انالارعا، زەينەتكەرلەرگە جانە ت.ب. ارنالعان ارنايى ۇسىنىستار بولادى. ءبىز سۋپەرماركەتتەردە، كيىم دۇكەندەرىندە، جانارماي قۇيۋ بەكەتتەرىندە تولەم جاساعانى ءۇشىن بونۋستار ۇسىنۋ سياقتى سەرۆيستەرگە ءجىتى ءمان بەرەمىز.

كەپىلزاتتى قارىزدارمەن جۇمىس قالاي ءوربيدى؟

- بىرىكتىرىلگەن بانكتە يپوتەكا حالىق بانكتىڭ كارتاسى ارقىلى جالاقى الۋشىلاردان باسقالارعا دا قولجەتىمدى بولادى. جالاقى جوباسىنىڭ قاتىسۋشىلارى جىلدىعى 12,5%-دان باستالاتىن (جتسم جىلدىعى 14,8%), قالعان كليەنتتەر - 17%-دان باستالاتىن (جتسم جىلدىعى 18,9%) مولشەرلەمەمەن يپوتەكالىق قارىز الا الادى. يپوتەكالىق قارىزدىڭ ەڭ ۇزاق مەرزىمى 20 جىلدى قۇرايدى، باستاپقى جارنانىڭ ەڭ تومەنگى مولشەرى – ساتىپ الىناتىن جىلجىمايتىن مۇلىكتىڭ قۇنىنان 20%-دان باستالادى (قوسىمشا كەپىلزات قويىلعاندا 0%).

بۇعان قوسا Qazkom-نىڭ جالاقى جوباسىنىڭ بارلىق قاتىسۋشىسى بانكتەر بىرىككەننەن كەيىن سەرىكتەس اۆتوسالوندار جەلىسىنەن، سونىمەن قاتار وتاندىق اۆتوكولىك وندىرۋشىلەردى قولداۋ مەملەكەتتىك باعدارلاماسى بويىنشا جاڭا كولىك ساتىپ الۋعا باستاپقى جارناسىز اۆتوكرەديت رەسىمدەي الادى. مۇنداي قارىزداردىڭ شارتتارى كليەنتتەردىڭ كوپشىلىگى ءۇشىن قولجەتىمدى بولماق.

بىرىككەن بانكتىڭ ونىمدەرى بويىنشا اقپارات تۇسىنىكتى، ال كليەنتتەرگە قىزمەت كورسەتۋ سالاسىندا قانداي وزگەرىستەر بولماق؟

  • ءبىز كليەنتتەرگە قىزمەت كورسەتۋ ساپاسىن باقىلايتىن ارنايى بولىمشە قۇرۋعا كىرىستىك. بانك ىشىندە ءتۇرلى پروتسەستەردى اۆتوماتتاندىرعان سايىن كورسەتەتىن سەرۆيسىمىزدىڭ دە ساپاسى وسەدى دەپ ۇمىتتەنەمىز. بۇل، ارينە، ۇزاق پروتسەسس، باعالاپ كورسەك بىرنەشە ايعا سوزىلادى ەكەن، سوعان قاراماستان ءبىز كليەنتتەرگە قىزمەت كورسەتۋدە ساپا مەن جىلدامدىققا جانە قىزمەتكەرلەردى دايىنداۋ جانە وقىتۋ ماسەلەسىنە اسا ءمان بەرەتىن بولامىز. سوندىقتان سەرۆيسىمىزدىڭ دەڭگەيى بۇدان ءارى كوتەرىلە تۇسەدى دەپ سەنىمدى تۇردە ايتا الامىن.

بۇل تاقىرىپتى قوزعاعان سوڭ بانكتىڭ ەڭ تالعامپاز كليەنتتەرى تۋرالى دا سۇراعان ءجون بولار.

— حالىق بانكتە مۇنداي كليەنتتەر ءۇشىن ارنايى پرەميۋم ايماقتارى قۇرىلعان. قازكوممەرتسبانكتە مۇنداي ايماق PERSONA دەپ اتالاتىن. سونىمەن قاتار، Qazkom-دا الەۋمەتتىك دارەجەسى، كىرىسى مەن دەپوزيتتىڭ كولەمى بويىنشا ايرىقشا كليەنتتەردىڭ قوسىمشا تولەمىنە پرەميالدى سەگمەنتكە ارنالعان بولىمشەلەردەن قىزمەت الۋ مۇمكىندىگى قاراستىرىلعان بولاتىن. مىنە، بۇل قىزمەت بىرىكتىرىلگەن بانككە ءوتىپ، پرەميۋم دارەجەسىندەگى كليەنتتەر ءۇشىن Vip مەنەدجەر، سونداي-اق جەكە مەنەدجەر قىزمەتى ەنگىزىلىپ، بۇل سەگمەنتتەگى كليەنتتەرگە جوعارى دارەجەدەگى قىزمەت الۋعا مۇمكىندىك بەرەدى.

فيليال جەلىسىمەن نە بولادى؟ قازكوممەرتسبانكتىڭ بولىمشەلەرى جابىلادى ما، الدە ولاردىڭ ءبارى حالىق بانكتىڭ فيليال جەلىسىنە قوسىلادى ما؟

  • ءبىز Qazkom بولىمشەلەرىن جاپپاي جابۋدى جوسپارلاپ وتىرعان جوقپىز. ارينە، حالىق بانك پەن قازكوممەرتسبانكتىڭ جاقىن ورنالاسقان بولىمشەلەرى ءبىرىن-ءبىرى قايتالاماس ءۇشىن ولاردى وڭتايلاندىرۋ شەشىمىن قابىلداپ جاتىرمىز، ياعني كەيبىر بولىمشەلەر جابىلادى، ال كەيبىرىنىڭ مەكەنجايى اۋىسادى نەمەسە ءبىر ءىرى بولىمشە بولىپ بىرىكتىرىلەدى. ءبىز، ارينە قازىرگى كليەنتتىك بازاعا قىزمەت كورسەتۋ ءۇشىن ساتۋ ارنالارىنىڭ كولەمىن بارىنشا قالدىرۋعا تىرىسامىز. قوس بانكتىڭ قايتالاناتىن بولىمشەلەرىن وڭتايلاندىرۋ بويىنشا جۇرگىزىلگەن جۇمىستاردى ەسكەرەتىن بولساق بىرىككەن بانكتە كليەنتتەرگە قىزمەت كورسەتۋدىڭ 635 ساتۋ ارناسى قىزمەت ەتەدى.

بۇل بىرىڭعاي ستاندارتقا كەلتىرىلگەن ءارى تارتىپتەلگەن ەڭ ءىرى جانە كەڭ دامىعان ايماقتىق جەلىسى بولادى دەپ كوزدەلۋدە. قازكوممەرتسبانكتىڭ قابىلداناتىن 166 بولىمشەسىن ورنالاسقان مەكەنجايى، پەرسونال شتاتى، كليەنتتەردىڭ اعىمىنا سايكەس بولەتىن بولامىز. بۇل جەردە ايتا كەتەرلىك ءبىر جايت، بىزدە Business - بولىمشەنىڭ جاڭا نۇسقاسى پايدا بولادى. بۇل بولىمشەلەردە تەك زاڭدى تۇلعالارعا قىزمەت كورسەتىلەدى. ازىرگە شاماسى 32 داناسى اشىلادى دەپ كۇتىلۋدە. بۇعان قوسىمشا حالىق بانكتىڭ ونىمدەرى مەن سەرۆيسىن كاسىپكەرلەر مەن حالىققا قىزمەت كورسەتەتىن بانك قىزمەتىنىڭ 54 ورتالىعى قۇرىلادى.

2015 جىلى قكب مەن بتا بىرىككەن كەزدە بولىمشەلەردە كەزەكتە تۇرۋ ماسەلەسى تۋىندادى. بۇل ماسەلە كوپتەگەن بانك وپەراتسيالارىن ينتەرنەت-بانكينگكە، بانكوماتقا، تولەم تەرمينالدارىنا اۋدارۋ ارقىلى شەشىلگەن بولاتىن. ال قازىر وسىنداي ماسەلەنىڭ الدىن الۋدى قالاي جوسپارلاپ وتىرسىزدار؟

كليەنتتەردى ينتەرنەت جانە ءموبيلدى بانكينگ، بانكوماتتار، تولەم تەرمينالدارى جانە مۋلتيكيوسكىلەر سياقتى قاشىقتىقتان قىزمەت كورسەتۋ ارنالارىنا كوشىرۋ بويىنشا ۇلكەن جوسپارلارىمىز بار، ياعني كليەنتتەر ونلاين تارتىبىندە اقشالارىن اۋدارىپ، تولەمدەرىن جاساپ قانا قويماي، دەپوزيتتەر دە اشا الادى، كارتالار شىعارۋعا جانە كرەديتتەر رەسىمدەۋگە وتىنىمدەر دە بەرە الادى. بۇعان قوسىمشا رەتىندە ءبىز قازكومنىڭ بەينەبانكينگىن دە بەلسەندى تۇردە ەنگىزۋدەمىز، ول كليەنتتەرگە قىزمەت كورسەتۋدى ايتارلىقتاي جىلدامداتۋعا، وسىلايشا بانك بولىمشەلەرىنىڭ جۇمىسىن جەڭىلدەتۋگە مۇمكىندىك بەرەدى. وسى جاڭالىقتىڭ بارلىعى – زامان تالابى، سوندىقتان، ءبىز، ميلليونداعان كليەنتتەرىمىزگە بارىنشا جىلدام ءارى ساپالى قىزمەت كورسەتۋ ءۇشىن ەڭ الدىڭعى قاتارلى جانە زاماناۋي قارجىلىق شەشىمدەردى ەندىرەمىز.

 “The Qazaq Times”