ەردوعان: ءبىز يراكتىڭ ءۇش بىردەي قالاسىنا سوققى جاساۋعا دايىنبىز

رەجەپ تايىپ ەردوعان: «تۇركيا ارمياسى يراكتىڭ ءۇش بىردەي قالاسىندا اسكەري وپەراتسيا جۇرگىزۋگە دايىن» – دەپ مالىمدەدى.  

تۇركيا پرەزيدەنتى رەجەپ تايىپ ەردوعان «CNN Turk» تەلەارناسىنا بەرگەن سۇحباتىندا: «تۇركيا ارمياسى يراكتىڭ ءۇش بىردەي قالاسىندا اسكەري وپەراتسيا جۇرگىزۋگە دايىن. اتاپ ايتقاندا ءبىز يراكتىڭ تەرروريستەر يەلىگىندەگى سيندجار، كانديل جانە ماحمۋر قالالارىنا سوققى جاساۋعا دايىنبىز. مەن بۇل وپپەراتسيا جونىندە العاش رەت ايتىپ وتىرمىن. سەبەبى اتالمىش قالالار لاڭكەستەردىڭ كوزىن جويۋدا ۇلكەن ستراتەگيالىق ماڭىزعا يە» - دەگەن.

بۇعان دەيىن تۇركيا ىشكى ىستەر ءمينيسترى سۋلەيمان سويلۋ NTV تەلەارناسىنا بەرگەن سۇحباتىندا: «سولتۇستىك يراك اۋماعىنداعى «كۇرد جۇمىسشىلار پارتياسى» تەررورلىق ۇيىمى تۇركيانىڭ تەرريتوريالىق تۇتاستىعىنا قاۋىپ توندىرۋدە. تۇركيا بۇدان بىلاي يراك اۋماعىنداعى لاڭكەستەرگە سىرتتاي باقىلاۋ جاساپ وتىرمايدى. ءبىز كەز كەلگەن ۋاقىتتا، كەز كەلگەن اۋماقتا اسكەري وپەراتسيا جۇرگىزۋگە دايىنبىز» - دەپ مالىمدەگەن.