رەسەي تمد ەلدەرىن ءسۇريا ماسەلەسىن بىرلەسىپ شەشۋگە شاقىردى

رەسەي قورعانىس ءمينيسترى سەرگەي شويگۋ تمد ەلدەرىن ءسۇريا ماسەلەسىن بىرلەسىپ شەشۋگە شاقىردى – دەپ حابارلايدى تاسس اقپارات اگەنتتىگى.

اگەنتتىك مالىمەتىنشە، سەرگەي شويگۋ تمد ەلدەرىنىڭ قورعانىس مينيسترلەرى كەڭەسىندە: «قازىرگى تاڭدا ءسۇريا اۋماعىنىڭ باسىم كوپشىلىگى تەرروريستەردەن ازات ەتىلدى. لاڭكەستەردىڭ حاليفات قۇرۋ جوسپارىنىڭ جولى كەسىلدى. قاۋىپسىزدىككە بىرلەسكەن كۇش-جىگەر ارقىلى عانا قول جەتكىزۋگە بولاتىنى بارلىعىنا ايان. وسىعان بايلانىستى سىزدەردى سيريادا بەيبىت ءومىر قالىپتاستىرۋعا ات سالىسۋعا شاقىرامىن» - دەپ مالىمدەگەن.

تمد  ەلدەرىنىڭ قورعانىس مينيسترلەرى كەڭەسىنە قازاقستان، وزبەكستان، قىرعىزستان، ءازىربايجان، تاجىكستان، رەسەي، ارمەنيا جانە بەلارۋس مەملەكەتتەرىنىڭ رەسمي وكىلدەرى مەن موڭعوليا قورعانىس ءمينيسترى نيامااگين ەنحبولد قۇرمەتتى قوناق رەتىندە قاتىسقان.

“The Qazaq Times”