تۇركىمەنستان پرەزيدەنتى قۇربانعۇلى بەردىمۇحامەدوۆ. فوتو: ca-news.

تۇركىمەنستان پرەزيدەنتى قۇربانعۇلى بەردىمۇحامەدوۆ «ورتالىق ازيا ەلدەرى باسشىلارىنىڭ كەڭەسىن» قۇرۋدى ۇسىندى.

تۇركىمەنستان رەسمي باق وكىلدەرىنىڭ مالىمەتىنشە، قۇربانعۇلى بەردىمۇحامەدوۆ وزبەكستانعا جاساعان رەسمي ءىس-ساپارى بارىسىندا ناۋرىز ايىندا استانا قالاسىندا وتكەن «ورتالىق ازيا ەلدەرى باسشىلارىنىڭ ءسامميتىن» «ورتالىق ازيا ەلدەرى باسشىلارىنىڭ كەڭەسى» - دەپ وزگەرتۋدى ۇسىنعان. بەردىمۇحامەدوۆتىڭ ۇسىنىسى بويىنشا، «ورتالىق ازيا ەلدەرى باسشىلارىنىڭ كەڭەسى» بەس جاقتىق كەزدەسۋلەردى ءجيى وتكىزىپ تۇرۋعا كومەكتەسەدى. ول ءۇشىن كەڭەس اياسىندا ارنايى جۇمىسشىلار توبى قۇرىلىپ، ايماقتاعى بەس مەملەكەتتىڭ سىرتقى ىستەر مينيسترلەرى الدىن الا كۇن تارتىبىندەگى ماسەلەلەردى بەلگىلەيتىن بولادى.

ەستەرىڭىزگە سالايىق، وزبەكستان پرەزيدەنتى شاۆكات ميرزيەەۆ پەن قازاقستان باسشىسى نۇرسۇلتان نازارباەۆتىڭ باستاماسىمەن قۇرىلعان «ورتالىق ازيا ەلدەرى باسشىلارىنىڭ ءسامميتى» ناۋرىز ايىنىڭ 15-ءى كۇنى استانا قالاسىندا وتكەن. وعان تۇركىمەنستان باسشىسى قۇربانعۇلى بەردىمۇحامەدوۆ قاتىسپاعان. ول ءوزىنىڭ ورنىنا ۇلى سەردار بەردىمۇحامەدوۆتى جىبەرگەن.

“The Qazaq Times”