تاۋەلسىز «دات» گازەتىنە 20 جىل تولدى

بيىل قازاقستانداعى تاۋەلسىز باسىلىم «دات» گازەتى ءوزىنىڭ 20 جىلدىق مەرەي تويىن اتاپ وتۋدە.

ءساۋىر ايىندا 1998 جىلى ەكس-پرەمەر-مينيستر اكەجان قاجىگەلديننىڭ باستاماسىمەن قۇرىلعان «دات» گازەتىنە 20 جىل تولدى. وسى ۋاقىت ارالىعىندا گازەت ۇجىمى ۇلتقا، مەملەكەتكە، ەل بولاشاعىنا قاتىستى دۇنيەلەردى تولىقتاي قامتىدى. گازەتتىڭ باس وقىرمانى ەرمۇرات باپي باستاعان قالام ۇستاعان قارا نارلار بيلىك تاراپىنان سان مارتە قىسىم كورىپ، باسىلىم اتاۋىن بىرنەشە رەت اۋىستىرسا دا، جوعارى بيلىككە «دات» ايتۋىن توقتاتقان جوق. وسىعان بايلانىستى بۇگىن ءبىز گازەت ۇجىمىن جانە مەديا-جوباعا قاتىسى بار بارلىق ازاماتتاردى قۇتتىقتاي وتىرىپ، «دات» باسىلىمىنىڭ 20 جىلدا ءجۇرىپ وتكەن جولىنا قىسقاشا توقتالۋدى ءجون كوردىك.

1998 جىلدىڭ 15 ساۋىرىندە «دات» گازەتىنىڭ العاشقى سانى شىقتى. بىراق ارادا 7 اي وتكەندە «قازاقستان -1» تەلەكومپانياسىنىڭ شاعىمى بويىنشا، سول كەزدەگى باسىلىمنىڭ باس رەداكتور ءشارىپ قۇراقباەۆ پەن گازەتكە 35 ميلليون تەڭگە ايىپپۇل سالىندى. اتالمىش قارجىنى تولەي المايتىن بولعاندىقتان «دات» ۇجىمى گازەتتى بانكروت دەپ جاريالادى.

1999 جىلدىڭ شىلدە ايى، «دات» گازەتى وقىرمان قاۋىمعا جاڭا اتاۋمەن جول تارتتى. گازەت ۇجىمى باسىلىم اتاۋىن «سول دات» - دەپ وزگەرتتى. بىراق بۇل جەردە دە تاۋەلسىز گازەت قيىندىقتارعا تاپ بولدى. «ءداۋىر» باسپاسى «سول داتتىڭ» «دات» مەديا-جوباسىنىڭ جالعاسى ەكەندىگىن ءبىلىپ، گازەتتى باسىپ شىعارۋدان، ال «قازباسپاسوز» جانە «داۋىس» باسپا ونىمدەرىن ساتۋ كومپانيالار گازەتتى ساتىلىمعا شىعارۋدان باس تارتتى. الايدا گازەت ۇجىمى ءوز جۇمىسىن بۇنىمەن توقتاتقان جوق. ءدال وسى جىلدىڭ قازان ايىندا «سول دات» رەسەيدىڭ التاي ايماعىنداعى رۋبتسوۆ قالاسىنان شىعا باستادى. ال جەلتوقسان ايىندا سول كەزدەگى باس رەداكتور مارات قابانباي قىزمەتىنەن كەتىپ، ونىڭ ورنىنا گازەتتىڭ قازىرگى باس وقىرمانى ەرمۇرات باپي كەلدى.

2000 جىلدىڭ 6 شىلدەسىندە ەل پرەزيدەنتى نۇرسۇلتان نازارباەۆتىڭ 60 جىلدىق مەرەي تويى قارساڭىندا «سول داتتىڭ» 50-ءشى مەرەكەلىك سانى جارىققا شىقتى. بىراق رەسەيمەن اراداعى «اۋل» كەدەن بەكەتىندە كەدەن قىزمەتكەردەرى ۇقك جانە قارجى پوليتسياسىنىڭ قاتىسۋىمەن باسىلىمنىڭ 50-ءشى تيراجىن تولىقتاي بۇعاتتادى. وسىدان كەيىن گازەت قىرعىزستان باسپاحانالارىنان شىعا باستادى. الايدا بۇل ۇزاققا سوزىلمادى. ارادا بىرنەشە اي وتكەندە قازاقستان ۇلتتىق قاۋىپسىزدىك كوميتەتىنىڭ ارالاسۋى سالدارىنان رەسەي مەن قىرعىزستاننىڭ شەكارالىق اۋداندارىنداعى باسپاحانالار «سولدات» ۇجىمىمەن بىرلەسىپ جۇمىس ىستەۋدەن باس تارتتى.

2001 جىلدىڭ قاڭتار ايى، ۇقك قىزمەتكەرلەرى «سول دات» رەداكتسياسىنا باسىپ كىرىپ، باعالى قۇرىلعىلار مەن كومپيۋتەرلەردى ىستەن شىعاردى. ءدال وسى جىلدىڭ ءساۋىر ايىندا گازەتتىڭ باس رەداكتورى ەرمۇرات ءباپيدىڭ ۇستىنەن قر قىلمىستىق كودەكسىنىڭ 318 بابىنىڭ 2 تارماعى «قر پرەزيدەنتىنىڭ ار-وجدانىنا نۇقسان كەلتىرۋ» بويىنشا قىلمىستىق ءىس قوزعالىپ، ءبىر جىلعا باس بوستاندىعىنان ايىرۋ جازاسىنا كەسىلدى. بىراق كەيىننەن ەرمۇرات باپيگە تاعىلعان ايىپ تاۋەلسىزدىكتىڭ 10 جىلدىعىنا وراي جاريالانعان امنيستياعا ىلىگىپ، سوت شەشىمى كۇشىن جويدى.

2002 جىلدىڭ مامىر ايى، «سول دات» گازەتىنىڭ رەداكتسياسىنا قاراقشىلىق شابۋىل جاسالىپ، باسىلىم قىزمەتكەرلەرى باقىتگۇل ماكىباي مەن كەنجە نۇرمۇحامەدۇلى سوققىعا جىعىلدى. وفيستەگى تەحنيكا مەن گازەتتىڭ قارجى قۇجاتتارى قولدى بولدى.

2003 جىلدىڭ ءساۋىر ايى، بوستاندىق اۋدانىنىڭ سوتى «سول دات» گازەتىنە 56 ميلليون تەڭگە ايىپپۇل سالدى.

2003 جىلدىڭ مامىر ايى، الماتى قالاسىنىڭ اۋدانارالىق سوتى ەراسىل ابىلقاسىموۆتىڭ ارىزىنا بايلانىستى «سول داتقا» 4 ميلليون تەڭگە كولەمىندە ايىپپۇل سالدى.

2004 جىلدىڭ شىلدە ايىن «دات» مەديا-جوباسىنىڭ اۆتورلارى «جۇما تايمس» گازەتىنىڭ ليتسەنزياسىن الدى.

2004 جىلدىڭ قاراشا ايى، «جۇماس تايمس» گازەتىنىڭ العاشقى سانى جارىققا شىقتى.

2005 جىلدىڭ اقپان ايى، الماتى قالالىق ۇقك دەپارتامەنتى «جۇما تايمستا» جارىق كورگەن «پورا زنات، كوگو ۆىبيرات. نارود كازاحستانا ۆىدۆيگاەت سۆوەگو كانديداتا ۆ پرەزيدەنتى» اتتى ماتەريالعا بايلانىستى قىلمىستىق كودەكستىڭ 318 بابىنىڭ 2 تارماعى بويىنشا ءىس قوزعادى.

وسى جاعدايلاردان كەيىن «دات» مەديا-جوباسىنىڭ اۆتورلارى گازەت اتاۋىن تاعى اۋىستىردى. بۇل جولى جازۋشى قابدەش ءجۇمادىلوۆتىڭ ۇسىنىسى بويىنشا، باسىلىم اتاۋى «تاسجارعان» بولىپ وزگەردى. بىراق «تاسجارعاندا» ۇزاققا بارعان جوق. ولدا بيلىك تاراپىنان كورسەتىلگەن قىسىمنان كەيىن جابىلىپ، «دات» مەديا-جوباسى 2009 جىلى اتىن «وبششەستۆەننايا پوزيتسيا» - دەپ وزگەرتتى. قازىرگى سىزبەن ءبىز وقىپ جۇرگەن 18 مىڭ دانامەن تارايتىن «وبششەستۆەننايا پوزيتسيا» گازەتى ءوز زامانىندا 50 مىڭ دانامەن تاراعان «دات» مەديا-جوباسىنىڭ جالعاسى.

«دات» گازەتى تاۋەلسىز قازاقستاندا جاسالعان ەڭ العاشقى مەديا-جوبالاردىڭ ءبىرى. ءبىز بۇگىن وسى ماتەريالدى جازاردا «دات» گازەتىنىڭ ءجۇرىپ وتكەن جولىنا قاراپ وتىرىپ قازاقستانداعى دەموكراتيانىڭ، ءسوز بوستاندىعىنىڭ، ادام قۇقىعىنىڭ قانشالىقتى تومەن دەڭگەيدە ەكەندىگىنە تاعى ءبىر مارتە كوز جەتكىزدىك.

"Qazaq Times" پورتالى 20 جىل بويى قيىندىق پەن قىسىمعا قاراماستان قازاقستاننىڭ جاڭارۋىنا، دەموكراتيالىق ەل بولۋىنا، ۇلت مۇددەسى مەن مەملەكەتتىڭ ەرتەڭى ءۇشىن "مىلتىقسىز مايداندا" كۇرەسىپ كەلە جاتقان «دات» گەزەتىنىڭ ۇجىمىن، وقىرماندارىن، ءار جىلدارى قىزمەت ىستەگەن جۋرناليستەرىن باسىلىمنىڭ 20 جىلدىق مەرەي تويىمەن قۇتتىقتايدى!

“The Qazaq Times”