فوتو: CBS

اقش-تىڭ كەنتۋككي شتاتىنداعى جوعارعى مەكتەپتەردىڭ بىرىنە 15 جاستاعى جىگىت وق جاۋدىرىپ، ناتيجەسىندە 2 وقۋشى قازا تاۋىپ، 17 ادام جارالاندى. قىلمىسكەر وقيعا ورنىندا ۇستالعان. كەنتۋككي اكىمشىلىگىنىڭ حابارلاۋىنشا، Marshall County جوعارعى مەكتەبىندە بولعان قايعىلى وقيعانىڭ قۇرباندارىنىڭ جاسى  قىلمىسكەرمەن شامالاس بولعان. قولدان جاسالعان قارۋدان وق اتقان ءجاسوسپىرىمنىڭ مۇنداي ىسكە نەگە بارعانى بەلگىسىز. بۇل تۋرالى ۆۆس اقپاراتتىق اگەنتتىگى جازدى.

جەرگىلىكتى پوليتسيا قىزمەتكەرلەرىنىڭ ايتۋىنشا، وقيعا تاڭەرتەڭ ساباق باستالاردان بۇرىن بولعان. قىلمىسكەر مەكتەپ الدىندا جينالعان ادامدارعا قاراي وق جاۋدىرعاننان كەيىن 15 مينۋتتان سوڭ پوليتسيانىڭ قولىنا تۇسكەن.

جاراقات العان وقۋشىلار جەرگىلىكتى مەديتسينا ورتالىعىندا ەم قابىلداپ جاتىر. بۇل - اقش مەكتەپتەرىندە سوڭعى كۇندەرى ورىن العان ەكىنشى قاندى وقيعا. وسى دۇيسەنبىدە تەحاس شتاتىنداعى تاعى ءبىر ءبىلىم ورداسىندا 16 جاستاعى وقۋشى ءوزىنىڭ سىنىپتاسىنا قارسى قارۋ سىلتەگەن بولاتىن. دەگەنمەن وققا ۇشقان قىز ءتىرى قالدى.

“The Qazaq Times”