جارىلىس جاساماق بولعان قىلمىستىق توپ قۇرىقتالعان. فوتو: BBC.

رەسمي كرەمل اقش-تىڭ ورتالىق بارلاۋ باسقارماسى پەتەربوردا (سانكت-پەتەبۋرگ) تەررورلىق شابۋىل بولاتىنىن ەسكەرتكەنىن ايتتى. مالىمەتتە تاعى "رەسەي پرەزيدەنتى پۋتين جەكسەنبى كۇنى اقش پرەزيدەنتىمەن تەلەفوندا سويلەسكەن كەزدە بۇل ەسكەرتۋگە ريزاشىلىعىن بىلدىرگەنى" تۋرالى ايتىلعان. قاۋىپتىڭ الدىن الۋعا جانە تەراكتىگە دايىندالىپ جاتقانداردى قاماۋعا مۇمكىندىك العانىن جەتكىزگەن. بۇل تۋرالى BBC-ءدىڭ رەسمي سايتى حابارلادى.

رەسمي مالىمدەمەدە پۋتين پەتەربوردا جاسالماق بولعان تەررورلىق شابۋىل تۋرالى الدىن الا مالىمەتتى جەتكىزگەن اقش-تىڭ ورتالىق بارلاۋ باسقارماسىنا جانە بارلاۋ قىزمەتكەرلەرىنە راحمەتىن ايتقان. پۋتين سونىمەن بىرگە رەسەيلىك بارلاۋ قىزمەتكەرلەرى اقش-قا جاسالعالى جاتقان تەررورلىق شابۋىلدار تۋرالى بىلگەن جاعدايدا، امەريكالىق ارىپتەستەرىنە حابار بەرۋگە كەپىلدىك ەتەتىنىن ايتقان.

مالىمدەمەدە، جەكسەنبى كۇنگى تەلەفوندا سويلەسۋ رەسەي تارابىنىڭ ۇسىنىسىمەن بولعانى ايتىلعان. اق ءۇي تارابى دا بۇل رەتكى تەلەفون ارقىلى بولعان اڭگىمەنى راستاعان. وتكەن جۇما كۇنى رەسەيدىڭ فەدەرالدىق قاۋىپسىزدىك قىزمەتى پەتەربوردا تەراكت جاساماق بولعان توپتىڭ تۇتقىندالعانىن حابارلاعان ەدى. مالىمەتكە قاراعاندا جارىلىس 16 جەلتوقسانعا جوسپارلانعان. اتالعان ىسكە قاتىستى دەلىنگەن 7 ادام تۇتقىندالعان. فەدەرالدىق قاۋىپسىزدىك قىزمەتىنىڭ مالىمەتىندە بۇلاردىڭ ءبارى دە «يسلام مەملەكەتى» ۇيىمىنىڭ مۇشەلەرى دەلىنگەن.

“The Qazaq Times”