ناتەنياحۋ: ماعان ەردوعاننىڭ اقىلى كەرەك ەمەس

يزرايل پرەمەر-ءمينيسترى نەتانياحۋ پالەستينالىقتاردى يەرۋساليم قالاسىن يزرايل استاناسى ەكەنىن مويىنداۋعا، سول ارقىلى بەيبىتشىلىكتى جالعاستىرۋعا شاقىردى. ونىڭ ايتۋىنشا، يەرۋساليم 3 مىڭ جىلدان بەرى ءيزرايلدىڭ ورتالىق قالاسى بولىپ كەلگەن جانە «وزگە بىردە ءبىر مەملەكەت ونى استانا رەتىندە قولدانباعان». بۇل تۋرالى BBC-ءدىڭ رەسمي سايتى حابارلادى.

وسىعان دەيىن بىرقاتار مۇسىلمان ەلدەرىندە يەرۋساليم تۋرالى اقش شەشىمىنە نارازىلىق بىلدىرگەن دەمونستراتسيالار بولدى. وتكەن اپتانىڭ سوڭىندا ليۆياداعى اقش ەلشىلىگىنىڭ الدىندا قاۋىپسىزدىك قىزمەتكەرلەر مەن ەرەۋىلشىلەر اراسىندا قاقتىعىس بولدى. يەرۋساليم قالاسىنىڭ وزىندە دە يزرايل پوليتسيا قىزمەتكەرلەرىمەن پالەستينالىق نارازى توپ اراسىندا قاقتىعىستار بارعان سايىن جيىلەي تۇسۋدە. اقش شەشىمىنە وكپەلى پالەستينا ۇكىمەتى ۆيتسە-پرەزيدەنت مايك پەنسپەن الدىن-الا جوسپارلانعان كەلىسسوزدى كۇشىنەن قالدىردى.

تۇركيا پرەزيدەنتى رەجەپ تايىپ ەردوعان اتالعان ماسەلەگە بايلانىستى ستامبۋلدا وتكەن شەرۋدە ءسوز سويلەدى. ول سوزىندە: «يەرۋساليمدى جاس بالالاردى ولتىرەتىن مەملەكەتكە بەرمەيمىز»، – دەدى. بۇعان ناتەنياحۋ «تۇركيا پرەزيدەنتى ءيزرايلدى بالاعاتتادى» دەپ وتىر. ول ءتىپتى ەردوعانعا قاراتىپ: «مەن ءوز مەملەكەتىندەگى كۇردتەردى باسىپ-جانشىعان، بالاعاتتاعان، جۋرناليستەردى قاماعان، يرانعا سالىنعان سانكتسيالاردان اينالىپ ءوتىپ، تەررورلىق توپتارعا قولداۋ كورسەتىپ، جازىقسىز ادامداردى ولتىرگەن ليدەردەن اقىل سۇراعىم كەلمەيدى»، – دەدى.

ەردوعان يرەۋساليمنىڭ ستاتۋسىن وزگەرتۋ «مۇسىلمانداردىڭ قىزىل سىزىعىنان وتكەندىك» دەپ باعالاپ، تۇركيا بۇل ءۇشىن يزرايلمەن بولعان ديپلوماتيالىق قاتىناستارىن ءۇزۋى مۇمكىن ەكەنىن ەسكەرتتى. وسىدان ءبىر جىل بۇرىن عانا ەكى ەل ديپلوماتيالىق قاتىناستارىن بەكەمدەي تۇسكەن ەدى.

“The Qazaq Times”