Photo: MFA of Kazakhstan

قىتايداعى قازاقتاردىڭ ماسەلەسىنە بايلانىستى وتىنىشتەردىڭ جيىلەۋىنە وراي، قر سىرتقى ىستەر مينيسترلىگى قازاقستان مەن قىتاي ديپلوماتيالىق ۆەدومستۆولارى قىتايداعى قازاقتاردىڭ ماسەلەسىن تالقىلاۋ ءۇشىن جۇيەلى تۇردە كونسۋلتاتسيا وتكىزىپ جاتقاندارىن ايتادى. بۇل تۋرالى ءسىم-ءنىڭ رەسمي سايتىندا جاريالاندى.

سىرتقى ىستەر مينيسترلىگىنىڭ سايتىندا، «27 قاراشادا قر سىرتقى ىستەر ءمينيسترىنىڭ ورىنباسارى اقىلبەك كامالدينوۆ قحر ەلشىسى چجان حانحۋەيمەن كەزدەستى. سونداي-اق قازاقستان رەسپۋبليكاسى سىرتقى ىستەر مينيسترلىگىنىڭ كونسۋلدىق قىزمەت دەپارتامەنتى جانە استاناداعى قحر ەلشىلىگىنىڭ كونسۋلدىق ءبولىم باسشىلىعىمەن قازاق دياسپوراسىنا (قحر ازاماتتارى) بايلانىستى ماسەلەلەردى شەشۋ جولىنداعى ىنتىماقتاستىق جونىندەگى كونسۋلتاتسيالار وتكىزىلدى. 9 قاراشادا قازاقستان رەسپۋبليكاسىنىڭ قىتايداعى ەلشىسى شاحرات نۇرىشەۆ قحر سىرتقى ىستەر ءمينيسترىنىڭ كومەكشىسى (ۆيتسە-مينيستر) لي حۋەيلايمەن كەزدەستى»، – دەپ حابارلاندى.

مالىمدەمەدە بەلگىلى بولعانداي، سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى ءۇرىمجى قالاسىندا بيىل جىل سوڭىنا دەيىن ساپارلاي بارماق. ساپار ماقساتى شىنجاڭداعى سىرتقى ىستەر باسقارماسى باسشىلىعىمەن كەزدەسۋ، سونىمەن بىرگە قر ءسىم پاسپورت جانە ۆيزالىق قىزمەت ينسپەكتسياسىن جاساۋ دەلىنگەن. ال جەلتوقسان ايىندا سىرتقى ىستەر ءمينيسترىنىڭ ورىنباسارى اقىلبەك كامالدينوۆ بەيجىڭ قالاسىنا ساپارلاي بارىپ، قىتايداعى قازاقتاردىڭ ماسەلەسىن قامتىعان قر-قحر اراسىنداعى قاۋىپسىزدىك سالاسىنداعى ىنتىماقتاستىق جونىندەگى كىشى كوميتەتتىڭ جانە ەكى ەل سىرتقى ىستەر مينيسترلىكتەر اراسىنداعى ساياسي كونسۋلتاتسيالار وتىرىسىن وتكىزگەلى وتىرعانى بەلگىلى بولدى.

بۇدان سىرت ءسىم جاريالاعان مالىمەتتە، پرەزيدەنت نۇرسۇلتان نازارباەۆتىڭ تاپسىرماسىمەن شەتەلدەگى قازاقتارعا قاتىستى ماسەلەلەر قر سىرتقى ىستەر مينيسترلىگىنىڭ نەگىزگى كۇن تارتىبىنە ەنگەنىن اتاپ ايتادى. الەمدەگى ءبىر تۇتاس قازاق دەيتىن ۇلت ءۇشىن قر ءسىم-ءى جاساپ جاتقان بۇل قادامى قۋانارلىق ءىس دەۋگە بولادى. ەندى تەك ءىسىنىڭ ءونىمى ەلدىڭ كۇتكەن جەرىنەن شىعىپ، دىتتەگەن ءىسىن تىندىرسا دەگەن تىلەك پەن ءۇمىت قاتار ارتىلماق.

“The Qazaq Times”