كەزدەسۋ. فوتو: mfa.kz

كەشە قازاقستاننىڭ سىرتقى ىستەر ءمينيسترى قايرات ءابدىراحمانوۆ بىرىككەن ۇلتتار ۇيىمىنىڭ ءسۇريا ماسەلەسى جونىندەگى ارنايى ۋاكىلى ستاففان دە ميستۋرامەن كەلىسسوزدەر وتكىزدى. بۇل تۋرالى مينيسترلىكتىڭ رەسمي سايتى حابارلادى. 

كەزدەسۋدىڭ باستى تاقىرىبى استانادا وتەتىن سيريالىق داعدارىستى رەتتەۋگە باعىتتالعان ءسۇريا اراب رەسپۋبليكاسى ۇكىمەتى مەن سۇريالىق قارۋلى وپپوزيتسيا اراسىنداعى حالىقارالىق كەزدەسۋگە قاتىستى بولدى.

س. دە ميستۋرا سۇريالىق كەلىسسوزدەردى استانادا وتكىزۋگە كەلىسىمىن بەرگەن قازاقستاننىڭ پرەزيدەنتى نۇرسۇلتان نازارباەۆقا بۇۇ باس حاتشىسى انتونيۋ گۋتەرريشتىڭ اتىنان العىسىن ءبىلدىرىپ، جاھاندىق ۇيىم استانا باسقوسۋىن وتكىزۋ باستاماسىن ءبىرىنشى بوپ قولداعانىن اتاپ ءوتتى.

دەلەگاتتار. فوتو: mfa.kz

ءوز كەزەگىندە ق. ءابدىراحمانوۆ قازاقستان بۇۇ-ن ءسۇريا داعدارىسىنا قاتىستى كەلىسسوزدەردى ۇيىمداستىرۋ ءۇردىسىنىڭ باستى قاتىسۋشى تاراپى رەتىندە تانيتىنىن جانە استانادا وتەتىن كەزدەسۋ جەنەۆاداعى بەيبىت كەلىسسوزدەردىڭ كەزەكتى وتىرىسىن وتكىزۋگە وڭ اسەرىن تيگىزەتىنىن ءبىلدىردى.

اڭگىمە بارىسىندا ديپلوماتتار سونىمەن قاتار استانا كەزدەسۋىنە قاتىستى بارلىق ۇيىمداستىرۋشىلىق ماسەلەلەردى دە تالقىعا سالىپ، سۇريالىق داعدارىستى رەتتەۋدى كوزدەگەن بەلسەندى ءىس-قيمىلداردى ودان ءارى جالعاستىرۋ قاجەت ەكەنىن اتاپ ءوتتى.

قازاقستاننىڭ سىرتقى ىستەر ءمينيسترى س. دە ميستۋرانى ەلىمىزدىڭ بەيبىتشىل باستامالارى جايىندا جانە قازاقستاننىڭ بۇۇ قاۋىپسىزدىك كەڭەسىنىڭ مۇشەسى رەتىندەگى جۇمىسىنىڭ باسىمدىقتارىنان حاباردار ەتتى.

سونداي-اق، ءدال سول كۇنى ق. ءابدىراحمانوۆ استانادا وتەتىن سۇرياداعى جاعدايدى رەتتەۋ بويىنشا حالىقارالىق كەزدەسۋگە قاتىستى ءتۇرلى ماسەلەلەردى تالقىلاۋ ماقساتىمەن يران يسلام رەسپۋبليكاسى، رەسەي فەدەراتسياسى جانە تۇركيا رەسپۋبليكاسى دەلەگاتسيالارىنىڭ باسشىلارىمەن كەزدەسۋ وتكىزدى.

"The Qazaq Times"