تاجىكستان شەتەلدە وقىپ كەلگەن يمامداردى جاپپاي جۇمىستان شىعارۋدا

تاجىكستان شەتەلدە وقىپ كەلگەن يمامداردى جاپپاي جۇمىستان شىعارۋدا.

تاجىكستان ءدىن جانە ادەت-عۇرىپ ىستەرى كوميتەتى توراعاسىنىڭ ءبىرىنشى ورىنباسارى امىربەك بەكنازاروۆ ايماقتارداعى كوميتەت باسشىلارىنا شەتەلدەردە وقىپ كەلگەن بارلىق يمامداردى جۇمىستان شىعارۋعا 15 كۇن ۋاقىت بەردى. جەرگىلىكتى باق وكىلدەرىنىڭ مالىمەتىنشە، ءدىن جانە ادەت-عۇرىپ ىستەرى كوميتەتىنىڭ باسشىلىعى اتالمىش جارلىققا قازان ايىنىڭ 28-ءى كۇنى قول قويعان. ولاردى بۇنداي قادامدارعا بارۋعا شەتەلدە ءبىلىم الىپ كەلگەن يمامداردىڭ وزدەرى يتەرمەلەگەن. ويتكەنى سوڭعى ءبىر جىلدا تاجىكستان بويىنشا، شەتەلدە وقىپ كەلگەن 20 يمام جات اعىمداردى ناسيحاتتاعانى ءۇشىن قاماۋعا الىنعان.

بۇعان دەيىن تاجىكستان بيلىگى «وزگە ەلدەردە ءدىني ءبىلىم الىپ جۇرگەن 3600 -دەن استام تاجىكستاندىق بار، ولاردىڭ بارلىعىن ەلگە قايتارۋ كەرەك» دەگەن مالىمدەمە تاراتقان بولاتىن. بىراق سوڭعى ستاتيستيكالىق مالىمەتتەر بويىنشا، ەل بيلىگىنىڭ بۇل مالىمدەمەسىنە قاراماستان ءالى كۇنگە دەيىن شەتەلدەردە 500-گە جۋىق تاجىكستاندىق ءدىني ءبىلىم الۋدا. ءبىر قىزىعى ءوز زامانىندا تاجىكستاننىڭ باس ءمۋفتيى سايدمۋكاررام ابدۋلقادىرزودانىڭ ءوزى پاكىستاندا، ال ءدىن جانە ادەت-عۇرىپ ىستەرى كوميتەتىنىڭ باسشىسى سۇلەيمەن داۆلاتزودا بولسا، پاكىستان مەن ساۋد ارابيادا وقىعان. ال اتالمىش زاڭنىڭ ولارعا قاتىسى بولا ما، جوق پا ازىرگە بەلگىسىز.

“The Qazaq Times”