تمد ەلدەرى اراسىندا قازاقستان ۇشاق اپاتى ءجيى بولاتىن ەكىنشى مەملەكەت

جىل باسىنان بەرى قازاقستاندا 9 ۇشاق اپاتى تىركەلىپ، 11 ادام قازا تاپقان. كورسەتكىش بويىنشا قازاقستان تمد ەلدەرى اراسىندا ەكىنشى ورىندا تۇر. بۇل تۋرالى استاناداعى باس كولىك پروكۋراتۋراسى، اۆياتسيا سالاسىنداعى جەتەكشىلەر جانە ارداگەر ماماندار قاتىسقان جينالىستا ءمالىم بولدى، دەپ حابارلايدى 24 kz.

ء"بىز قاۋىپسىزدىكە كەرى اسەر ەتەتىن بىرنەشە سەبەپتى انىقتادىق. ءبىرىنشىسى – ۇشاقتاردىڭ تەحنيكالىق جاعدايى. قازىر جەڭىل اۆياتسياداعى ۇشاقتاردىڭ 75 پايىزى 30 جىل بۇرىن قۇراستىرىلعان. بۇل تەك تىركەلگەندەرى عانا. ال ەكىنشى سەبەپ – اپاتتاردى جاسىرۋ. ماسەلەن، ازاماتتىق اۆياتسيا اكادەمياسى «تەحنام» ۇشاعى قۇلاعانعا دەيىن وسىعان ۇقساس اپاتتى جاسىرعان بولىپ شىقتى. ەگەر اكادەميا بۇل تۋرالى حابارلاعاندا جاۋاپتى ورگان ءبىر شەشىم قابىلدار ما ەدى", - دەيدى قر باس كولىك پروكۋراتۋراسىنىڭ باسقارما باستىعى الماس امانوۆ.

ازاماتتىق اۆيتسيا سالاسىندا 40 جىلدان استام ەڭبەك ءوتىلى بار ارداگەر ماقاش ابىشەۆتىڭ نەمەرەسى  وسىنداي اپاتتان قازا تاپقان. بيىلعى جىلدىڭ تامىز ايىندا الماتى تۇبىندە قۇلاعان «تەحنام» ۇشاعىنىڭ ىشىندە قاريانىڭ نەمەرەسى بولعان. 22 جاستاعى كۋرسانت ايدار ابىشەۆ اپاتتان امان قالمادى. سوندىقتان ماقاش ابىشەۆ سالاداعى جۇيەگە وزگەرىس كەرەك ەكەنىن ايتادى.

"ماعان ۇشاق قۇيىن اعىنىنا ءتۇستى دەپ ايتقىلارى كەلەدى. ال وعان نە سەبەپ بولدى؟ باسشىلار مەن جۇيەنىڭ جاۋاپسىزدىعى. وسىنىڭ الدىن الۋ قاجەت. مەن جاس جىگىتتەردىڭ قازا تاپقانىن، اتا-انالاردىڭ مەن سياقتى جىلاعانىن قالامايمىن. جاۋاپتى مەكەمە وكىلدەرى بۇل ىسكە قاتىستى تەرگەۋدىڭ ءالى ءجۇرىپ جاتقانىن جەتكىزدى. جالپى جىل باسىنان بەرى ەلىمىزدە 9 ۇشاق اپاتى تىركەلىپ، 11 ادام قازا تاۋىپتى. بۇل كورسەتكىش بويىنشا قازاقستان تمد ەلدەرى اراسىندا ەكىنشى ورىندا تۇر", - دەدى ماقاش ابىشەۆ.

ال قر ينۆەستيتسيالار جانە دامۋ مينيسترلىگى باسقارما باسشىسى مىندەتىن اتقارۋشى جامبىل ءيسيننىڭ سوزىنشە، اۆياتسيالىق اپاتتاردىڭ 44 پايىزىنا ادامي فاكتور، 31 پايىزىنا اۋا رايى سەبەپ بولادى ەكەن. سونداي-اق اۆياتسيالىق تەحنيكانىڭ سىر بەرۋى اپاتتاردىڭ 25 پايىزىندا بايقالادى ەكەن.

ال مۇنداي اپاتتاردى الدىن الۋدىڭ ازىرگە ەشبىر مەحانيزمى قولعا الىنىپ وتىرعان جوق.

“The Qazaq Times”