فوتو: kapital.kz

ەۋرازيالىق ەكونوميكالىق وداققا مۇشە ەلدەر قازاقستان ءۇشىن 1 ملرد دوللارىنان ايرىلدى. بۇل تۋرالى قىرعىزستاننىڭ مەملەكەتتىك كەدەن قىزمەتى توراعاسىنىڭ ورىنباسارى زاميربەك نيازاليەۆ مالىمدەدى، دەپ حابارلايدى Sputnik كىرگىزستان.

باسىلىمنىڭ مالىمەتىنشە، كەدەن ورگانىنىڭ قىزمەتكەرى، سونداي-اق  ەكونوميكا ءمينيسترى ارتەم نوۆيكوۆ قر پرەمەر-ءمينيسترى باقىتجان ساعىنتاەۆتىڭ قىرعىزتانعا قاراتا ايتقان مالىمدەمەسىن دۇرىس ەمەس جانە نەگىزسىز دەپ ەسەپتەيدى. ونىڭ سوزىنشە، قازاقستان ۇكىمەتىنىڭ ءادىسى بويىنشا ەسەپ جۇرگىزسە، ەاەو-نىڭ جوعالتقان قاراجاتى تەك قىرعىزستان ءۇشىن عانا ەمەس.

"2016 جىلعى قىرعىزستان مەن قىتاي اراسىنداعى ستاتيستيكالىق ايىرماشىلىق 4,1 ملرد دوللاردى قۇرادى. وسى كەزەڭ بويىنشا كازاقستانداعى كورسەتكىش 4,6 ملرد دوللاردى قۇرايدى. ەگەر ءبىز وسى ءتاسىل بويىنشا ەسەپتەر بولساق، قازاقستان تاراپىنان جوعالعان قارجى 1 ملرد دوللارعا تەڭ بولادى", - دەدى  نيازاليەۆ.

سونداي-اق، قىرعىزستان ۇكىمەتىنىڭ اقپاراتىنا سەنسەك، ساعىنتاەۆ كەدەندىك باجدىڭ جوعالعان سوماسىن ەسەپتەۋدىڭ ناقتى مەحانيزمىن كورسەتىپ وتىرعان جوق.

"ەگەر كەدەندىك باج سالىعىنىڭ جوعالعان سوماسى قىتايدان اكەلىنەتىن تاۋارلار كولەمىنە سايكەس ورتاشا كەدەندىك باعا مولشەرىنە كوبەيتۋ ارقىلى ەسەپتەلەتىن بولسا، وندا جوعارىدا كورسەتىلگەن ءادىستى قولدانۋ نەگىزسىز", - دەلىنگەن باسىلىم حابارلاماسىندا.

ايتا كەتەيىك، بۇدان بۇرىن قازاقستان پرەمەر-ءمينيسترى باقىتجان ساعىنتاەۆ قىرعىز كەدەن قىزمەتىن قاتاڭ سىنعا العان ەدى. ونىڭ سوزىنشە، قازاقستان وسىعان دەيىن دە قىرعىز كەدەن قىزمەتى ءتيىستى دەڭگەيدە جۇمىس ىستەمەيتىندىگىن ايتقان جانە وسى جولعى قازاق-قىرعىز شەكاراسىندا بولعان داۋدىڭ شىعۋىنا باستى سەبەپكەر قىرعىزستان تاراپى. ويتكەنى وسى ۋاقىتقا دەيىن قىرعىز بيلىگى ەاەو ەلدەرىنىڭ وزگە مۇشەلەرىنە كەدەن قىزمەتى بويىنشا جالعان اقپارات بەرىپ كەلگەن. وعان دالەل رەتىندە ساعىنتاەۆ مىرزا سوڭعى جىلدارداعى ستاتيستيكالىق مالىمەتتەردى مىسالعا كەلتىرگەن بولاتىن.

“The Qazaq Times”