فوتو: مك-تۋرتسيا

اننەكتسيالانعان قىرىمدا سوتتالعان تاتار كوشباسشىلارى رەسەيدى تاستاپ تۇركياعا بەت الدى - دەپ حابارلايدى نەمىس تولقىنى اقپارات اگەنتتىگى.

قازان ايىنىڭ 25-ءسى كۇنى 2016 جىلدان بەرى رەسەيدىڭ قىرىمدى اننەكتسيالاۋىنا قارسى شىققان ءۇشىن تۇرمەدە جاتقان قىرىم تاتارلارى ءماجىلىسى توراعاسىنىڭ ورىنباسارلارى يلمي ۋمەروۆ پەن احتەم چيگوز بوستاندىققا شىعارىلعان. 2016 جىلى رف قىرىم ايماعى بويىنشا فەدەرالدى قاۋىپسىزدىك قىزمەتى ۋميروۆتى «رەسەي فەدەراتسياسىنىڭ تۇتاستىعىنا نۇقسان كەلتىردى» دەپ ايىپتاپ، 26 قىركۇيەك كۇنى سيمەروپول اۋداندىق سوتى ونى ەكى جىلعا باس بوستاندىعىنان ايىرعان. ال احتەم چيگوزدى قىرىم جوعارعى سوتى "2014 جىلى 26 اقپان كۇنى قىرىم پارلامەنتى الدىندا بولعان تارتىپسىزدىكتى ۇيىمداستىردى" دەپ ايىپتاپ، سەگىز جىلعا سوتتاعان. بىراق ۋمەروۆ تا، چيگوز دە وزدەرىنىڭ كىناسىز ەكەندىكتەرىن ايتىپ، بولعان جاعدايلاردىڭ بارلىعىنىڭ ساياسي استارى بار دەپ مالىمدەگەن.

يلمي ۋمەروۆ پەن احتەم چيگوزدى قولداۋ اكتسياسى.

ۋكراينا پرەزيدەنتى پەتر پوروشەنكونىڭ سوزىنشە، ولاردىڭ قىسقا ۋاقىت ىشىندە بوستاندىققا شىعۋىنا تۇركيا پرەزيدەنتى رەجەپ تايىپ ەردوعاننىڭ تىكەلەي قاتىسى بار. ول ءتىپتى ءوزىنىڭ Twitter  پاراقشاسىندا قىرىم تاتارلارى باسشىلارىنىڭ بوستاندىققا شىعۋىنا بايلانىستى: «مەن احتەم چيگوزبەن يليم ۋمەروۆتىڭ بوستاندىققا شىققانىنا وتە قۋانىشتىمىن. بۇل ءۇشىن تۇركيا پرەزيدەنتىنە راحمەت ايتقىم كەلەدى. ءبىز بۇل جايىندا بۇعان دەيىن نيۋ-يورك جانە كيەۆ قالالارىندا وتكەن كەلىسسوزدەردە سويلەسكەن بولاتىنبىز» - دەپ جازعان.

جەرگىلىكتى باق وكىلدەرىنىڭ مالىمەتى بويىنشا، ۋمەروۆ پەن چيگوزدىڭ بوستاندىققا شىعۋى مەن انكاراعا جەتكىزىلۋى تۇركيا پرەزيدەنتى رەجەپ تايىپ ەردوعاننىڭ رەسەي باسشىسى ۆلاديمير پۋتينمەن كەلىسسوز جۇرگىزۋىنەن كەيىن جۇزەگە اسىرىلعان.

“The Qazaq Times”