ەۋروپاداعى قارت ايەلدەردىڭ سانى كوبەيگەن

ەۋروپاداعى ءاربىر بەسىنشى ايەل جانە  اربىر التىنشى ەر ازامات - 65 جاستا. عالىمداردىڭ ايتۋىنشا، 2047 جىلعا  قاراي ولار فيزيكالىق قابىلەتسىزدىگىنە بايلانىستى دارىگەر كومەگىنە مۇقتاج بولۋى مۇمكىن.  BMJ Open مەديتسينالىق جۋرنالى ەۋروپادا كۇن ساناپ ءوسىپ كەلە جاتقان قارتتىق ماسەلەسى مەن جالعىزدىقتى تاڭدايتىن (وتباسىن قۇرماۋ) جاستار تۋرالى زەرتتەۋ جۇرگىزگەن. 

جۋرنال قىزمەتكەرلەرىنىڭ ايتۋىنشا، زەرتتەۋ ناتيجەلەرى دەنساۋلىق ساقتاۋ سالاسى بيۋدجەتىنە جاۋاپتى ازاماتتاردى قۋانتا قويمايدى. ويتكەنى قارتتار بارلىعى دەرلىك ولارعا قارايتىن ءوز بالالارى مەن جانۇياسى بولماعان كەزدە كيىنۋ، كۇندەلىكتى تاماقتانۋ سياقتى قاراپايىم شارۋالاردى اتقارۋعا قوسىمشا كۇتۋشى مەن مەديتسينالىق قىزمەتكەردى قاجەت ەتەدى.

عالىمدار ەۋروپانىڭ 26 ەلىندە جۇرگىزگەن زەرتتەۋ نىساندارى (قارتتار) ءبىر بولعانىمەن، مادەني ەرەكشەلىكتەرگە بايلانىستى ءارتۇرلى ناتيجەلەرگە قول جەتكىزىلگەنىنە تاڭدانىسپەن ايتادى. ماسەلەن، گەرمانيادا 65 جاستاعى جانە ودان جوعارى ايەلدەردىڭ 27 پايىزى تىم بولماعاندا ءبىر دەرتىمەن دارىگەرگە جۇگىنسە، نيدەرلاندىنىڭ وسى جاستاعى ازاماتشالارىنىڭ تەك 12 پايىزىن عانا بەلگىلى ءبىر سىرقات ءتۇرى مازالايدى. ياعني، بۇل ادامداردىڭ تاماقتانۋ ادەبى مەن سپورتقا دەگەن ىنتاسى، ءومىر سالتىنا تىكەلەي بايلانىستى. نيدەرلاندىدا ۆەلوسيپەد ەڭ تانىمال كولىك ءتۇرى ەكەنىن ەستىگەن بولارسىز؟!

زەرتتەۋ توبىنىڭ مۇشەسى ماريانا ۆەبەر: "ەۋروپاداعى قارتتاردىڭ سانى الداعى 30 جىلدا وسى قارقىنمەن ارتا بەرەدى. بۇل قوسىمشا مەديتسينالىق قىزمەتكەرلەرگە دەگەن سۇرانىس تۋدىراتىنى جانە مەملەكەتتىك شىعىندى ارتتىراتىنى داۋسىز", - دەيدى.

“The Qazaq Times”