فوتو: Tengrinews

Forbes Kazakhstan قازاقستانداعى ەڭ ىقپالدى 50 بيزنەسمەننىڭ ءتىزىمىن جاريالادى. ءتىزىم بويىنشا سوڭعى بەس جىلدا تانىمال بيزنەسمەندەر كوشىن باستاپ تۇرعان بولات وتەمۇراتوۆ ەكىنشى ورىنعا ءتۇستى. 

سونىمەن قازاقستاننىڭ ەڭ ىقپالدى بيزنەسمەنى تيمۋر قۇلىباەۆ بولدى. ول ءوزىنىڭ بيزنەستەگى ارىپتەسى، بەس جىل بويى رەيتينگتە ءبىرىنشى ورىندا كەلگەن بولات وتەمۇراتوۆتى ىعىستىردى.  تيمۋر قۇلىباەۆ ءبىرىنشى ورىندا العاش رەت بولىپ وتىرعان جوق. ول Forbes Kazakhstan-نىڭ 2011 جىلعى رەيتينگىندە ەڭ الدىڭعى ورىندا بولعان.

Forbes Kazakhstan-نىڭ بيىلعى تىزىمىنە جاڭادان بەس ادام قوسىلدى. ولار: سينگاپۋردا تىركەلگەن  Kusto Group ترانسۇلتتىق كومپانياسىنىڭ يەسى 41 جاستاعى ەركىن تاتىشەۆ (№35), «ۆيراج سەرۆيس قاراعاندى» جشس يەسى، «قازەنەرگوماش كورپوراتسياسى» نەگىزىن قالاۋشى  55 جاستاعى ەرلان نىعماتۋلين (№39), Seimar Investment Group يەسى جانە «Asadel Group» ۆەنچۋرلىق قورىنىڭ قاتىسۋشىسى 50 جاستاعى مارعۇلان سەيسەنباەۆ (№45) جانە «اركادا» دەۆولوپەر توبىنىڭ جەتەكشىسى 51 جاستاعى الەكسەي نەفەدوۆ (№46) پەن  «الاگەۋم» ماشينا جاساۋ توبىنىڭ نەگىزىن قالاۋشى 58 جاستاعى سايدۋللا قوجاباەۆ (№50) .

بۇدان بولەك، بۇرىن تىزىمنەن شىعىپ قالعان ءۇش بيزنەسمەن رەيتينگكە قايتا ىلىنگەن. ولار: Zhersu ينۆەستيتسيا-وندىرىستىك كوورپوراتسياسىنىڭ نەگىزىن قالاۋشى، 49 جاستاعى باۋىرجان وسپانوۆ (№31), تساتەك كومپانياسى جانە «Circle Maritime Invest» كەمە قاتىناسى كومپانياسى يەلەرىنىڭ ءبىرى، 49 جاستاعى سەرگەي كان (№38), سونداي-اق، Tenge Oil&Gas يەسى، «Tengri Bank» اق ديرەكتورلار كەڭەسىنىڭ توراعاسى، 53 جاستاعى تيمۋر قۋانىشەۆ (№42).

ال بىلتىرعى جىلى رەيتينگتە بولعان 8 ادام -  نۇرجان سۋبحانبەردين، ەدۋارد وگاي، وريفدجون شاديەۆ، نۇرلان تىلەۋباەۆ، اندرەي لاۆرەنتەۆ، ۆاسيلي روزينوۆ، الماس مىڭباەۆ  جانە ياكوۆ تسحاي بيىلعى تىزىمگە كىرگەن جوق.

رەيتينگكە كىرگەن بيزنەسمەندەردىڭ 46%-ى وزدەرىنىڭ پوزيتسياسىن جاقسارتسا، 34%-نىڭ پوزيتسياسى تومەندەگەن، 8%-ى ساقتاپ قالدى، ال 10%-ى تىزىمگە جاڭا قوسىلعاندار.

ايتا كەتەيىك، ەلىمىزدەگى الدىڭعى ورىندى بيزنەسمەندەردىڭ بارلىعى بيلىكپەن تىكەلەي بايلانىستى جانە قازاقستانداعى ءىرى مۇناي ورىندارى مەن بانك سەكتورىنىڭ يەلەرى. ال اتالعان سەكتورلاردا حالىق قارجىسىنىڭ ءبىر بولىگى بار ەكەنى بەلگىلى.

“The Qazaq Times”