فوتو: Reuters

گەرمانيانىڭ ىشكى ىستەر ءمينيسترى Thomas De Maiziere مۇسىلماندار كوپ تۇراتىن ايماقتاردا ولاردىڭ ءدىني مەرەكەلەرىن ايماقتىق دەڭگەيدە اتاپ ءوتۋدى ۇسىندى. حريستيان دەموكراتيالىق وداعى پارتياسىنىڭ وكىلىنىڭ ۇسىنىسى نەمىس قوعامىندا ەكىجاقتى پىكىر تۋدىرىپ، اتالعان تاقىرىپ توڭىرەگىندەگى تالاستار ۇدەدى. بۇل تۋرالى ءال-جازيرا اقپاراتتىق اگەنتتىگى جازدى. 

وتكەن ايدا وتكەن فەدەرالدى سايلاۋدا جەڭىسكە جەتكەن Thomas De Maiziere مۇسىلماندار قۋانا قابىلداعان باستاماسىن ەلدىڭ سولتۇستىك-باتىسىنداعى تومەنگى ساكسونياداعى سايلاۋالدى كامپانياسى كەزىندە كوتەرگەن بولاتىن. ول ءوز سوزىندە: "گەرمانيانىڭ كونستيتۋتسياسىنا سايكەس، مەملەكەتتىڭ 16 شتاتى (ايماعى) دا اتاپ وتىلەتىن ءدىني مەرەكەلەردى وزدەرى تاڭداۋعا قۇقىلى. ءبىز حريستيان دىنىندەگى اتاۋلى داتالاردى نازاردان تىس قالدىرمايمىز. نەگە مۇسىلمانداردىڭ دا قاسيەتتى مەرەكەلەرىن تويلاماسقا؟"- دەدى.

جوعارىدا اتالعان پارتيانىڭ جانىنان قۇرىلعان وداقتاس حريستيان سوتسيالدىق پارتياسى ءمينيستردىڭ بۇل ويىن قۇپتامادى. ولار گەرمانيانى حريستيان مەملەكەتى سانايدى جانە تاريحي، ءداستۇرلى نەگىزدەردى ەسكەرىپ، وزگە ءدىني مەرەكەلەردى تويلاۋدى ورىنسىز كورەدى.

گەرمانيانىڭ سوتسيال-دەموكراتيالىق پارتياسىنىڭ باسشىسى مارتين شۋلز بۇل باستاماعا "ويلانۋعا تۇرارلىق ەكەن" دەگەن باعا بەرسە، AFD پارتياسى تۇبەگەيلى قارسىلىق ءبىلدىردى.

“The Qazaq Times”