اقش تۇركيا باسشىلارى. فوتو: Sputnik International.

ەستەرىڭىزدە بولسا وسى اپتانىڭ سوڭىندا اقش پەن تۇركيا ەلشىلىكتەرى ءبىر-بىرىنە ۆيزا بەرۋدى توقتاتقانىن ارت-ارتىنان جاريا ەتكەن ەدى. الايدا، بۇگىن تۇستەن بۇرىن تۇركيا ۇكىمەتىنىڭ وكىلدەرى بۇل داعدارىستىڭ تەك ۋاقىتشا ەكەنىن ايتتى. بۇل تۋرالى تۇركيانىڭ پرەمەر-ءمينيسترىنىڭ ورىنباسارى مەحمەت شيمشەك مالىمدەگەن بولاتىن. حاباردى سول ەلدىڭ «تۇرىك تەلە-راديو» قىزمەتىنىڭ رەسمي سايتى جازدى.

مەحمەت شيمشەك 11-15 قازان ارالىعىندا ۋاشينگتوندا وتەتىن حالىقارالىق ۆاليۋتا قورى جانە الەم بانكتەرىنىڭ كەڭەسىنە قاتىسۋ ءۇشىن قۇراما شتاتقا ساپارلاي باردى. ول تۇركيا ەكونوميكاسى اتىنان فورۋمدا سويلەگەن سوزىندە تۇرىك جۇرتىنىڭ ەكونوميكادا كوپ رەت رەفورمانى جۇزەگە اسىرعانىن، قازىر الەمنىڭ 13-ءشى ورىنىندا تۇرعان تۇركيا ەكونوميكاسىنىڭ جاي-كۇيىن، قۇراما شتاتپەن الداعى ۋاقىتتا بارلىق سالاداعى ىنتىماقتاستىقتى باياعىداي قالىپتى ۇستاپ تۇراتىندىقتارىن ايتتى. ول وتكەن اپتادا بولعان ۆيزا بەرۋدەگى داعدارىستىڭ تەك ۋاقىتشا ەكەنىن ايتىپ ءوتتى.

مەحمەت شيمشەك سوزىندە: «تۇركيا ەگەمەن ءارى نامىستى ەل رەتىندە اقش-تىڭ ۆيزا ساياساتىنا بىردەي دەڭگەيدە عانا جاۋاپ بەردى»، – دەدى. سونىمەن بىرگە، تۇركيا مەن اقش-تىڭ كوپ جاقتاردا مۇددەلەستىگىن ەسكەرە وتىرىپ، قارىم-قاتىناستاردىڭ قولايلى ءارى اشىق بولۋى كەرەك دەگەندى اتاپ ءوتتى. ۆيزا داعدارىسىنىڭ شەشىم تابۋىن تۇركيا جاق تا اسىعا كۇتەتىنىن جەتكىزدى.

“The Qazaq Times”