فوتو: guardian.ccom

يسپانيادا كاتالونيانىڭ تاۋەلسىزدىگىنە قارسى كوتەرىلىستەر باستالادى دەپ كۇتىلۋدە. يسپانيانىڭ تۇتاستىعىن قولداۋ قوزعالىسى ەل استاناسى مادريد پەن كاتالونيانىڭ ورتالىعى بارسەلونادا جانە وزگە دە قالالاردا قارسىلىق شاراسىن ۇيىمداستىرىپ جاتىر. بۇل تۋرالى ۆۆس اقپاراتتىق اگەنتتىگى جازدى. 

وسىدان الدىن يسپانيانىڭ بيلىك وكىلدەرى كاتالونيا حالقىنان رەفەرەندۋمعا توسقاۋىل بولۋعا تىرىسقان پوليتسيا قىزمەتكەرلەرىنىڭ دورەكىلىگى ءۇشىن كەشىرىم سۇرادى. دەگەنمەن ولار كاتالونيانىڭ تاۋەلسىزدىك جاريالاۋى كونستيتۋتسياعا قايشى كەلەتىن زاڭسىز ارەكەت دەگەن ويلارىن وزگەرتكەن جوق.

كاتالونيانىڭ پرەزيدەنتى كارلس پۋدجەمونت تاۋەلسىزدىك تۋرالى دەكلاراتسيانى قابىلداۋ ءۇشىن جەرگىلىكتى پارلامەنتتىڭ قاراۋىنا جولداعان بولاتىن. بىراق يسپانيانىڭ جوعارعى كونستيتۋتسيالىق سوتى دۇيسەنبى كۇنگە جوسپارلانعان كاتالونيا پارلامەنتىنىڭ باسقوسۋىن وتكىزۋگە تىيىم سالدى. ەندى الداعى اپتانىڭ سەيسەنبىسىندە كارلس پۋدجەمونت كاتالونيا پارلامەنتىنىڭ قابىلداۋىنا كەلەدى دەپ جوسپارلانعان.

كاتالونيانىڭ بۇرىنعى باسشىسى ارتۋر ماس Financial Times باسىلىمىنا بەرگەن سۇحباتىندا اۆتونوميالىق ءوڭىردىڭ تاۋەلسىزدىككە دايىن ەمەستىگىن ايتقان. يسپانيانىڭ بيلىك وكىلدەرىنىڭ ءبىرى قالىپتاسقان جاعدايدى وڭتايلى شەشۋ ءۇشىن، جالپى حالىقتىق داۋىس بەرۋدى قايتا ۇيىمداستىرۋ تۋرالى ۇسىنىس ايتقان بولاتىن. يسپانيا تاراپىنان قابىلدانباعان وتكەن جەكسەنبىدەگى رەفەرەندۋم قورىتىندىسى بويىنشا 2,3 ملن ادام نەمەسە داۋىس بەرگەندەردىڭ 90 پايىزى تاۋەلسىز مەملەكەت بولۋدى قولدايتىندارىن بىلدىرگەن.

“The Qazaq Times”