كوممۋنالدىق قىزمەت قۇنى: ەاەو ەلدەرىندەگى باعا قانداي؟

قر ۇلتتىق ەكونوميكا ۆيتسە-ءمينيسترى سەرىك جۇمانعارين وسى اپتادا 2018 جىلدان باستاپ قازاقستاندا كوممۋنالدىق قىزمەت تاريفتەرى جوسپارلى تۇردە قىمباتتايتىنىن مالىمدەگەن ەدى. ول "جاڭا جىلدان باستاپ ءبىز ۇزاق مەرزىمدى جوسپار بويىنشا تاريفتەردى كوتەرە باستايمىز. بىراق كوپ ەمەس، باعانى كوتەرۋ 10 پايىزدان اسپايدى" دەگەن. نەگىزى بۇل ماسەلە جونىندە قىركۇيەك ايىنىڭ باسىندا-اق، پرەزيدەنت نۇرسۇلتان نازارباەۆ جالپى ۇكىمەت وتىرىسىندا ءسوز قوزعاپ، ء"بىز جىلۋ مەن سۋ تاريفتەرىن كوتەرمەسەك، ينۆەستورلار كەلمەيدى... ودان قورقۋدىڭ (تاريفتەردى قىمباتتاتۋ - رەد.) قاجەتى جوق" دەگەن. ياعني ەلدەگى كوممۋنالدىق تاريفتەردىڭ قىمباتتاۋى پرەزيدەنت مالامدەمەسىنە تىكەلەي بايلانىستى بولۋى مۇمكىن. بۇگىن ءبىز وسىعان بايلانىستى ەۋرازيالىق ەكونوميكالىق وداققا مۇشە ەلدەردەگى تاريفتەردىڭ قانداي ەكەنىن بايقاپ كوردىك. 

سونىمەن وداققا مۇشە ەلدەردىڭ ستاتيستيكالىق اگەنتتىكتەرىنىڭ مالىمەتتەرىنە سەنسەك، ەلەكتر قۋاتىنىڭ ءتيىمدى باعاسى قىرعىزستاندا، جىلۋ تاريفتەرى بويىنشا بەلورۋس ارزان بولىپ وتىر. ال  رەسەيدە  ەلەكتر جانە گازدى قوسپاعاندا قىمبات تاريفتەر تۇرعىن ءۇي كوممۋنالدىق قىزمەتتىڭ بارلىق تۇرلەرىندە بايقالادى. قىمبات باعا بويىنشا ارمەنيا الدىڭعى ورىندا تۇر.

قازاقستاندا سۋىق سۋدىڭ كۋب مەترى ورتاشا ەسەپپەن71,6 تەڭگە، ىستىق سۋدىكى 222 تەڭگە. ال رەسەيدە اتالعان كورسەتكىشتەر 2-4 ەسەگە جوعارى: سايكەسىنشە، تەڭگە ەكۆيۆالەنتىمەن  158,2 تەڭگە جانە 807,5 تەڭگەنى قۇرايدى.

ال قىرعىزستاندا ورتاشا ەسەپپەن ءاربىر ادام ايىنا سۋىق سۋعا 277 تەڭگە، ىستىق سۋعا 1,5 مىڭ تەڭگە تولەيدى. ەگەر قازاقستاندا ءبىر وتباسىندا 3 ادام تۇرادى دەسەك، ولار ورتاشا ەسەپپەن 7 كۋب مەتر سۋىق سۋ جانە 5 كۋب مەتر ىستىق سۋ جۇمسايدى، سوندا سۋىق سۋعا 501 تەڭگە، ىستىق سۋعا 1,1 مىڭ تەڭگە تولەنەدى. ال قىرعىزستاندا بۇل باعا 831 جانە 4,5 مىڭ تەڭگەنى قۇرايدى.

قازاقستاندا ەلەكتر قۋاتى تۇتىنۋ كولەمىنە بايلانىستى بولادى. ەنەرگيانى جۇمساۋدا 100 كۆت-قا كەتەتىن ورتاشا شىعىن 1,5 مىڭ تەڭگە، ماكسيمالدى شىعىن 1,8 مىڭ تەڭگە. باعا ەلەكتر پەشتەرىن قولدانعان جاعدايدا قىمبات بولادى.

ال قىرعىزستاندا باعا بىزگە قاراعاندا الدەقايدا تومەن. بۇل ەلدىڭ ءبىر عانا تۇرعىنى ساعاتىنا 700 كۆت ەنەرگيادان از جۇمسايتىن بولسا، 100 كۆت ساعات ءۇشىن 378,07 تەڭگە تولەيدى. ال ەگەر 700 كۆت-تان كوپ بولسا، 100 كۆت ساعات ءۇشىن 1,1 مىڭ تەڭگە قارجى جۇمسايدى. بۇل ەاەو ەلدەرى اراسىنداعى ەڭ تومەنگى باعا.

بۇدان بولەك قازاقستاندا گازدىڭ كۋب مەترى ورتاشا ەسەپپەن 17,05 تەڭگەگە باعالانعان. بەلورۋستا جىلۋ ماۋسىمى كەزىندە باعا بىزدىكىنەن ءسال عانا جوعارى - 17,23 تەڭگە. الايدا بۇل ەلدە جاز مەزگىلىندە باعا كەرىسىنشە قىمباتتاپ، شامامەن گازدىڭ كۋب مەترى 54,02 تەڭگە بولادى. قىرعىزستاندا ءبىر ادام گازعا ايىنا 807 تەڭگە تولەيدى.

“The Qazaq Times”