فوتو: kazinform.kz

2018 جىلدان باستاپ كوممۋنالدىق قىزمەت تاريفتەرى جوسپارلى تۇردە قىمباتتايتىن بولادى. بۇل تۋرالى قر ۇلتتىق ەكونوميكا ۆيتسە-ءمينيسترى سەرىك جۇمانعارين مالىمدەدى. 

"جاڭا جىلدان باستاپ ءبىز ۇزاق مەرزىمدى جوسپار بويىنشا تاريفتەردى كوتەرە باستايمىز. بىراق كوپ ەمەس، باعانى كوتەرۋ 10 پايىزدان اسپايدى", - دەدى ول ەنەرگەتيكانى باقىلاۋ جانە ينۆەستيتسيا جونىندەگى كونفەرەنتسيادا.

ايتا كەتەيىك، قىركۇيەك ايىنىڭ باسىندا پرەزيدەنت نۇرسۇلتان نازارباەۆ ينۆەستورلاردى تارتۋ ماقساتىندا تۇرعىن ءۇي-كوممۋنالدىق شارۋاشىعىنا قاتىستى زاڭدى جەتىلدىرۋ كەرەكتىگى تۋرالى ۇكىمەتكە تاپسىرما بەرگەن. ول "سۋ جانە جىلۋ جۇيەسىن مودەرنيزاتسيالاۋعا كوپ قاراجەت قاجەت ەكەنىن" ايتقان ەدى.

"حالىقارالىق قارجى ينستيتۋتتارى مەن ينۆەستورلاردى تارتۋ ءۇشىن تۇرعىن ءۇي كوممۋنالدىق شارۋاشىلىعى جونىندەگى زاڭدى جەتىلدىرىپ، تاريفتەردى قايتا قاراۋ كەرەك. بۇل وسى سالاداعى تۇتىنۋشىلار مەن تابيعي مونوپوليا سۋبەكتىلەرىنىڭ قىزىعۋشىلىعىن قالىپتى ەتۋگە مۇمكىندىك بەرەدى. مەنىڭ ايتقىم كەلگەنى، ءبىز جىلۋ مەن سۋ تاريفتەرىن كوتەرمەسەك، ينۆەستورلار كەلمەيدى. ويتكەنى ءاربىر كەلگەن ينۆەستور "مەن ستانتسيا سالايىن، بىراق ەلەكتر ەنەرگياسىن قانشاعا ساتا الامىن؟" دەپ سۇرايدى. ودان قورقۋدىڭ (تاريفتەردى قىمباتتاتۋ - رەد.) قاجەتى جوق", - دەگەن ەدى پرەزيدەنت.

وسىدان سوڭ ۇلتتىق ەكونوميكا مينيسترلىگى قازاقستانداعى تۇرعىن ءۇي كوممۋنالدىق  تاريفتەرىنىڭ نەلىكتەن وسەتىنىن رەسمي تۇردە دالەلدەدى. سەبەبى كوممۋنالدىق قىزمەتتەگى نەگىزگى قۇرالدارىنىڭ كوپشىلىگى 65%-عا توزىپ كەتكەن ەكەن. ۆەدومستۆو وسى سەبەپتى "ينجەنەرلىك جەلىلەردى جاڭارتىپ، قايتا قۇرىپ، جاڭعىرتۋ قاجەت" دەپ مالىمدەدى. وسىلايشا 2020 جىلعا دەيىن تاريفتەردى كوتەرۋ ارقىلى كوممۋنالدىق قۇرىلعىلاردىڭ توزۋ كورسەتكىشىن 50%-عا دەيىن تومەندەتپەك.

قازاقستان ەنەرگەتيكا سالاسىن دامىتۋ ماقساتىندا EXPO-2017 كورمەسىن وتكىزدى. ال كورمە بىتە سالا تاريفتەردى كوتەرۋ تۋرالى شەشىم قابىلداۋ اقىلعا قونبايدى. بىزدە كەرىسىنشە، كورمە ارقىلى ەنەرگەتيكا سالالارى دامىپ، كوممۋنالدىق تاريفتەر تومەندەۋ كەرەك ەدى. الايدا ۇكىمەت مۇنى ەسكەرىپ وتىرعان جوق سياقتى. ەگەر تاريفتەر قىمباتتار بولسا، بۇل قاراپايىم حالىقتىڭ قالتاسىنا وڭاي تيمەيتىنى انىق.

“The Qazaq Times”