ەردراننىڭ كۇردىستان ساپارى. فوتو: Middle East Eye.

تۇركيا پرەزيدەنتى رەجەپ تايىپ ەردوعان دۇيسەنبى كۇنى وتكەن رەفەرەندۋم ناتيجەسىندە يراكتاعى كۇرد اۆتونومياسى تاۋەلسىزدىك الاتىن بولسا، اتالعان ايماقتىڭ تۇرعىندارى اشارشىلىققا ۇشىرايتىنىن ەسكەرتكەن بولاتىن.  الايدا، ساراپشىلار تۇرىك باسشىسىنىڭ بۇل ءسوزى يراك كۇردتەرىنەن كورى تۇركياداعى كۇردتەرگە قاراتا ايتقانى دەپ قارايدى.  بۇل تۋرالى BBC سايتى جازدى.

تۇركيا بيلىگى يراكتاعى كۇرد اۆتونومياسىنىڭ تاۋەلسىزدىك رەفەرەندۋمى تۇرىك جەرىندەگى كۇردتەردىڭ بۇلىگىن كۇشەيتەدى دەپ قاۋىپتەنەدى. 25 قىركۇيەك كۇنى وتكىزىلگەن رەفەرەندۋم ناتيجەسى ءالى دە جاريا بولمادى. سولاي بولا تۇرسا دا كوپشىلىك ساراپشىلار، رەفەرەندۋمعا قاتىسقانداردىڭ كوپشىلىگى تاۋەلسىزدىك الۋدى قولداپ داۋىس بەرگەن دەپ بولجايدى. دەگەنمەن كۇردستان اۆتونومياسىنىڭ بيلىگى بۇل داۋىس بەرۋ ناتيجەسىن تەز ارادا جاريالاي قويۋعا نيەتتى ەمەس ەكەنى بەلگىلى بولىپ وتىر. ولار داۋىس بەرۋ ناتيجەسىن يراك ۇكىمەتىمەن جانە كورشىلەس ەلدەردىڭ بيلىگىمەن جۇرگىزەتىن كەلىسسوزدە العا تارتقىسى كەلەدى.

ەردوعان كۇردتەردىڭ رەفەرەندۋمىن «ساتقىندىق»، «ۇلتتى تۇتاستىق پەن قاۋىپسىزدىككە قاتەر ءتوندىرۋ» دەپ اتاعانىمەن، تۇركيا بيلىگىنىڭ يراكتىق كۇردتەرمەن تىعىز بايلانىسى بار ەكەنى دە ءمالىم. تۇركياعا يراكتاعى كۇردىستان ارقىلى وتەتىن مۇناي قۇبىرلارى، تۇرىك ەلىنىڭ ەنەرگەتيكالىق قاجەتتىلىگىنىڭ ءبىر ءبولىمىن قاناعاتتاندىرىپ وتىر. سوندىقتان ەردوعاننىڭ پىكىرلەرى مەن اسكەري جانە ساياسي قادامدارى تۇركيانىڭ اۋماعىندا ءومىر ءسۇرىپ جاتقان كۇردتەرگە قاراتىلىپ وتىرعانىن اڭعارتادى.

انكارا بيلىگىنىڭ تاعى ءبىر الاڭدايتىنى، كۇرد اۆتونومياسى ءوز شەكارالىق اۋماعىنا بالايتىن كيركۋك قالاسىنداعى ەتنيكالىق تۇركىمەندەردىڭ تاعدىرى بولىپ وتىر. بىراق بۇل الاڭداۋشىلىعى، انكارانىڭ ىشكى قاۋىپسىزدىگىنە دەگەن الاڭداۋشىلىعىنىڭ جانىندا ەشتەڭە دە ەمەس. كەشە جاساعان مالىمەتىندە ەردوعان ماسۋد بارزانيدىڭ اقىر سوڭىنا دەيىن داۋىس بەرۋ ناتيجەسىن كۇشىنەن قالدىرۋىن كۇتەتىنىن جەتكىزگەن. دەگەنمەن كۇردىستاننان تۇركياعا وتكەن مۇناي تاسىمالىنىڭ جىلدىڭ العاشقى جارتى ايىنداعى تابىسى 5 ملرد اقش دوللارىن قۇرايدى. تۇركيا بۇنداي تابىستى ايماقپەن ارا قاتىناسىن وڭايلىقتا ۇزە قويماسى مۇمكىن.

“The Qazaq Times”