بۇگىن كۇردىستان تاۋەلسىزدىك ءۇشىن رەفەرەندۋم وتكىزەدى

يراكتاعى كۇردىستان اۆتونومياسىنىڭ باسشىسى ماسۋد بارزاني وسى ايدىڭ 25 قىركۇيەگىنە جوسپارلاعان جەكە تاۋەلسىز مەملەكەت بولۋ ستاتۋسىن انىقتايتىن رەفەرەندۋم وتكىزۋ تۋرالى ويىنان باس تارتپايتىنىن مالىمدەدى. ال يراكتىڭ پرەزيدەنتى فۋاد ماسۋم (ۇلتى - كۇرد) ماسۋد ءبارزانيدىڭ بۇل ارەكەتىن "ساۋاتسىز شەشىم" دەپ اتاسا، ەلدىڭ پرەمەر-ءمينيسترى حايدەر  ال-ابادي رەفەرەندۋمعا توسقاۋىل بولۋ ءۇشىن ءتيىستى شارالار قولداناتىنىن حابارلادى.   بۇل تۋرالى APF اقپاراتتىق اگەنتتىگى جازدى. 

كۇردىستان اۆتونومياسىنىڭ باسشىسى جەرگىلىكتى تۇرعىنداردى رەفەرەندۋمنان قالماي، داۋىس بەرۋگە شاقىردى جانە باعدادپەن كەلىسسوزدەر جۇرگىزۋگە تىرىسقان ارەكەتى ناتيجەسىز اياقتالعانىن جەتكىزدى. يراك پەن كۇردىستان اۆتونومياسى اراسىندا مۇنايعا باي كيركۋك قالاسىنا قاتىستى تەرريتوريا داۋى بار ەكەنى بەلگىلى. ماسۋد بارزاني الداعى 1-2 جىل كولەمىندە يراكپەن مۇنايلى اۋداندارعا قاتىستى شەكارا ءبولىسۋ ماسەلەسىن تالقىلايتىنىن ايتتى.

پرەمەر-ءمينيستردىڭ يراكتىڭ تۇتاستىعىن ساقتاپ قالۋ ءۇشىن قولىنان كەلگەن ىستەن ايانبايتىنىن حابارلاعان مالىمدەمەسىنەن كەيىن، ماسۋد بارزاني كۇردتەردى ارانداتۋشىلىققا ەرمەي، تەررورلىق اكتىدەن، اشىق قاقتىعىستان اۋلاق بولۋعا شاقىردى.

يران پرەزيدەنتى حاسان روۋحاني مەن تۇركيا باسشىسى رەجەپ تايىپ ەردوعان تەلەفون ارقىلى اڭگىمە بارىسىندا يراكتاعى كۇردىستاننىڭ تاۋەلسىزدىك الۋى ۇلكەن "حاوسقا" الىپ كەلەدى دەپ ءتۇيىپ، يراك ۇكىمەتىن قولدايتىنىن ءبىلدىردى. تەھران يراكتاعى كۇردىستان ءۇشىن يراكتىڭ سۇرانىسىمەن اۋە جولدارىن جاۋىپ تاستايتىنىن مالىمدەدى.

بۇگىن بولاتىن رەفەرەندۋمعا 5 ملن ازامات قاتىسادى دەپ كۇتىلىپ وتىر. جەرگىلىكتى حالىق تاۋەلسىزدىكتى قالايتىندارىن، بىراق رەفەرەندۋمنان كەيىنگى جاعدايدىڭ ۋشىعۋىنان قورقاتىندىقتارىن ايتادى. ماسەلەن، 30 جاستاعى مۇعالىم كاميران انۆار: "مەن ەرتەڭ داۋىس بەرمەيمىن! ويتكەنى ونان كەيىن، ءبىزدىڭ وڭىرگە ەمبارگو سالىنىپ، اس-سۋسىز، ازاماتتىق سوعىستىڭ استىندا قالامىز با دەپ قورقامىن. ءبىر كۇنى تاڭەرتەڭ كوزىمدى اشىپ، تۇرىك اسكەرىنىڭ قارۋ اسىنىپ جۇرگەنىن كورگىم كەلمەيدى" دەپ اشىپ ايتتى.

“The Qazaq Times”