فوتو: storeled.kz

الماتى قالاسى اكىمدىگى مەملەكەت مۇقتاجدىعىنا بايلانىستى كەيبىر جەكە مەنشىك جەر ۋچاسكەلەرى مەن جىلجىمايتىن مۇلىكتەردى ءماجبۇرلى تۇردە جەكە يەلىكتەن شىعارۋ جۇمىستارىن باستاماق. اكىمدىكتىڭ اتالعان قاۋلىسى "ۆەچەرنىي الماتى" گازەتىندە جاريالاندى.

جاريالانعان مالىمەتتەر بويىنشا، قاۋلى الماتى قالاسى مەدەۋ اۋدانى رىسقۇلوۆ داڭعىلى مەن قۇلجا تراسساسىنىڭ قيىلىسىندا ورنالاسقان جىلجىمايتىن مۇلىك پەن جەر ۋچاسكەلەرىنە قاتىستى بولىپ وتىر.

ونداعى جەر تەلىمدەرى ترانسپورتتارعا ارنالعان جول تورابىن سالۋ ءۇشىن اكىمدىككە وتپەك. جەرلەردى يەلىكتەن شىعارۋ كۇنى 2017 جىلدىڭ 31 جەلتوقسانىنا بەلگىلەنگەن. اكىمدىكتىڭ مالىمەتىنشە، جەر يەلەرىنە زاڭنامادا بەلگىلەنگەن ءتارتىپ بويىنشا وتەماقى تولەنەدى.

سونىمەن قاۋلىنىڭ قوسىمشاسىندا  جاريالانعان تىزىم بويىنشا «Magnum Cash&Carry» جشس، «Caspian Food»جشس، «اقباستاۋ لوگيستيك» جشس جەرلەرى ءماجبۇرلى تۇردە جەكە يەلىكتەن شىعارىلادى.

ايتا كەتەيىك، Magnum Cash&Carry بولشەك ساۋدا جەلىسىنىڭ نەگىزىن قالاۋشى الەكساندر گاربەر. ول Forbes Kazakhstan-نىڭ "قازاقستانداعى ەڭ باي 50 بيزنەسمەن" رەيتينگىندە 125 ملن دوللار قارجىسىمەن 41 ورىندا تۇر.  الەكساندر گاربەر  سونداي-اق، «پريما ديستريبيۋشن»، «پريما موروجەنوە»، «پريما اۋتلەت گرۋپپ»، «پريما برەند»، TG Trade, Tea House سىندى كومپانيالاردىڭ يەسى.

“The Qazaq Times”