فوتو:

قايرات كەلىمبەتوۆتىڭ سوزىنشە، "استانا" حالىقارالىق قارجى ورتالىعى قىزمەتكەرلەرىنىڭ جالاقىسى لاۋازىمىنا قاراي 1 ملن تەڭگەگە دەيىن جەتەتىن بولادى. بۇل تۋرالى ول ۇكىمەت ۇيىندە وتكەن ءباسپاسوز كونفەرەنتسياسىندا جۋرناليستەردىڭ سۇراعىنا جاۋاپ بەرۋ كەزىندە ايتتى. 

"مەن پرەزيدەنت جارلىعىمەن "استانا" حقا" اق كەڭەسىنىڭ توراعاسى بولىپ تاعايىندالدىم. جالاقى "بايتەرەك" نەمەسە "سامۇرىق-قازىنا" قورىنداعىداي جوعارى ەمەس، از بولۋى دا مۇمكىن. ەرەجەگە سايكەس، بيىل بىزدە بونۋس تا، پرەميا دا بولمايدى. ال مەنىڭ جالاقىما كەلەر بولساق ۋايىمداۋدىڭ قاجەتى جوق، ول تولىققاندى قولجەتىمدى. بىزدەگى جالاقى قىزمەتكەرلەردىڭ لاۋازىمىنا بايلانىستى ايىنا 1 ملن تەڭگەگە دەيىن بارادى", - دەدى كەلىمبەتوۆ.

سونداي-اق، ول ءتۇرلى سۇراقتار تۋىنداماس ءۇشىن بجزق ديرەكتورلار كەڭەسىنىڭ مۇشەسى رەتىندە ءوزىنىڭ زەينەتاقى دەكلاراتسياسىن جاريالاعانىن اتاپ ءوتتى.

بۇدان بولەك كەلىمبەتوۆ حالىقارالىق قارجى ورتالىعىنداعى شەتەلدىك ساراپشىلاردىڭ جالاقىسى ءتيىستى كومپانيانى قۇرۋعا كومەكتەسەتىنىن اتاپ ءوتتى.

استانا قالاسىنداعى قارجى ورتالىعى اراب امىرلىكتەرىنىڭ تاجىريبەسى بويىنشا قۇرىلعان. 2015 جىلدىڭ مامىر ايىندا ەكسپو-2017 كورمەسىنىڭ نىساندارى ورتالىقتىڭ نەگىزى بولاتىنى ايتىلعان ەدى. وسىلايشا "استانا" حقو ورتالىق ازياداعى ءىرى قارجى ورنى بولماق.

قايرات كەلىمبەتوۆ بۇعان دەيىن دە حقو جالپى اعىلشىن زاڭى بويىنشا جۇمىس ىستەيتىنىن بىرنەشە رەت ايتقان. ونىڭ ايتۋىنشا، لوندون، سينگاپۋر، دۋباي، كاتار سىندى ەلدەردىڭ ۇزدىك تاجىريبەلەرى تاۋەلسىز رەتتەۋشى جۇمىسىندا قولدانىلاتىن بولادى.

الايدا ايتا كەتەيىك، بىزدە كوپ دۇنيەنىڭ اتى دارداي بولعانمەن، ىستەگەن ىستەرىنىڭ شالا ەكەنى بەلگىلى. ءبىر عانا "سامۇرىق-قازىنا" ۇاق-نىڭ ءوزى قاراجاتتى جۇمساۋعا قاتىستى ۇنەمى سىنعا قالىپ جاتادى. ال ەرتەڭ حقو-عا دا سىن ايتىلماسىنا كىم كەپىل؟!

“The Qazaq Times”