لوندون - الەمدەگى ەڭ ءىرى قارجى ورتالىعى

ۇلىبريتانيانىڭ ەۋروپالىق وداقتان شىعۋ تۋرالى شەشىمىنە قاراماستان، لوندون قالاسى الەمدەگى ەڭ ءىرى قارجى ورتالىقتارىنىڭ تىزىمىندە ءبىرىنشى ورىندى يەلەندى. بۇل تۋرالى  Z/Yen Group Ltd. قارجى-كونسالتينگتىك كومپانياسىنىڭ شولۋىنادا ايتىلعان. اتالعان كومپانيا حالىقارالىق قارجى ورتالىقتارىنىڭ يندەكسىن (Global Financial Centres Index, GFCI) جارتى جىلدا ءبىر رەت ەسەپتەپ وتىرادى.

اقش-تىڭ نيۋ يورك قالاسى بولسا ەكىنشى ورىنعا ءتۇسىپ قالدى. ساراپشىلار مۇنى اقش پرەزيدەنتى دونالد ترامپتىڭ ساۋدا ساياساتىمەن بايلانىستىرادى.

ءۇشىنشى ورىندا گونكونگ، ودان كەيىن سينگاپۋر تۇر. توكيو بەسىنشى ورىندا قالدى. سونداي-اق، العاشقى وندىققا شانحاي  تورونتو، سيدنەي، تسيۋريح جانە بەيجىڭ كىرەدى، قىتاي استاناسى بىردەن 6 پوزيتسياعا كوتەرىلگەن.

بۇدان بولەك، لوندونداعى قارجى وپەراتسيالارىنىڭ باسقا ەۋروپالىق قالالارعا اۋىستىرىلۋى سول قالالاردىڭ رەيتينگىن كوتەرگەن. مىسالى فرانكفۋرت 23 ورىننان 11 ورىنعا، دۋبلين 33 ورىننان 30 ورىنعا كوتەرىلگەن.

چيكاگو مەن ۋاشينگتون رەيتينگتە بىردەن 17 جانە 16 ساتىعا تومەندەپ كەتكەن. ۆەنا 22 ورىننان 42 ورىنعا دەيىن تومەندەدى.

دۋباي تاياۋ شىعىس ەلدەرى اراسىندا ءىرى قارجى ورتالىقتارىنىڭ كوشىن باستاپ تۇر (تىزىمدە 18 ورىن). ەكىنشى ورىندا -  ابۋ-دابي (تىزىمدە 25 ورىن).

ۆارشاۆا شىعىس ەۋروپا بويىنشا ەڭ ءىرى قارجى ورتالىعى (الەمدە 36-ورىن جانە رەيتينگتە 5 ساتىعا جوعارىلادى) رەتىندە تانىلدى. تاللين مەن ريگا، كەرىسىنشە، رەيتينگتە تومەندەپ، 44 جانە 53 ورىنعا يە بولدى.

ايتا كەتەيىك، قازاقستاندا 2018 جىلدان باستاپ "استانا" حالىقارالىق قارجى ورتالىعى جۇمىس ىستەيتىن بولادى. بۇل ورتالىقتىڭ ماقساتى - الەمدىك تانىمال بيرجالاردى قازاقستاندا توپتاستىرۋ جانە تەحنولوگيا مۇمكىندىگى زور جاڭا قارجى الاڭىن قۇرۋ. ورتالىق ارقىلى استانا قالاسىنىڭ دا ءىرى قارجى ورتالىعى بولۋعا مۇمكىندىگى بار. تەك بۇكپەسىز، اشىق جۇمىستار اتقارىلۋى كەرەك.

“The Qazaq Times”