فوتو: Reuters

برازيليا رەسمي تۇردە مەملەكەتتىڭ بۇرىنعى پرەزيدەنتتەرى رۋسەف ديلما مەن لۋيس يناسيۋ لۋلا دا سيلۆانى Petrobras مۇناي كومپانياسىنا قاتىستى جەمقورلىق ءىسى ءۇشىن ايىپتادى. بۇل تۋرالى ءال-جازيرا اقپاراتتىق اگەنتتىگى جازدى.

اتالعان قىلمىستىق ىستە باس ايىپتاۋشىنىڭ ءرولىن اتقاراتىن رودريگو يانوت جۇمىسشىلار پارتياسىنىڭ رۋسەف ديلما مەن لۋل دا سيلۆانى قوسا ەسەپتەگەندە 6 مۇشەسى مۇناي كومپانياسىنان زاڭسىز جولمەن اقشا جىمقىرىپ، جەمقورلىق جاساعاندارىن جەتكىزدى.

بۇل 2016 جىلى يمپيچمەنتتەن كەيىن بيلىكتەن كەتكەن رۋسەف ديلماعا قارسى ۇسىنىلىپ وتىرعان العاشقى ايىپتاۋ. ەكس-پرەزيدەنتتەرگە تاعىلعان كىناعا قاراماستان، ولار برازيلياداعى ەڭ ىقپالدى ساياساتكەرلەر قاتارىندا قالىپ وتىر. 2018 جىلى پرەزيدەنتتىك سايلاۋعا كانديداتۋراسىن ۇسىنعالى وتىرعان لۋلا دا سيلۆا ءۇشىن اتالعان سوت پروتسەسى جاعىمسىز جاڭالىق بولدى.

باس پروكۋراتۋرانىڭ ايتۋىنشا، قىلمىستىق توپ جەمقورلىقپەن 2002 جىلدان 2016 جىلدىڭ مامىر ايىنا دەيىن اينالىسىپ كەلگەن.

جۇمىسشىلار پارتياسىنىڭ وكىلدەرى وداقتاستارىنا تاعىلعان ايىپتاۋلاردى جوققا شىعارىپ، بۇل وقيعانى حالىقتىڭ نازارىن وسىعان دەيىن پاراقورلىق بابى بويىنشا جاۋاپقا تارتىلعان فەدەرالدى پروكۋروردىڭ ىسىنەن باسقا تاراپقا اۋدارۋ ءۇشىن ۇيىمداستىرىلعان دەپ ەسەپتەيدى. رۋسەف ديلمانىڭ وكىلى پروكۋراتۋرانىڭ ناقتى ەشقانداي دالەلدەر مەن ايعاقتار ۇسىنباعانىن ايتادى.

“The Qazaq Times”