فوتو: defensor.kz

ەنەرگەتيكا ءوندىرۋشى كومپانيالاردىڭ  "قازترانسگاز ايماق" اق الدىنداعى قارىزى 3,8 ملرد تەڭگەنى قۇرايدى. بۇل تۋرالى ۇكىمەت وتىرىسىندا قر ەنەرگەتيكا ءمينيسترى قانات بوزىمباەۆ مالىمدەدى. 

ءمينيستردىڭ سوزىنشە، وڭتۇستىك قازاقستان وبلىسىنىڭ قارىزى 2,3 ملرد تەڭگە بولعاندىقتان وسى جىلدىڭ 27 ناۋرىزىنان باستاپ شىمكەنت جىلۋ ەنەرگيا ورتالىعىنا گاز جەتكىزۋ توقتاتىلعان. سونداي-اق، شىلدە-تامىز ايلارىندا كومپانيانىڭ ەسەپ ايىرىسۋ شوتتارى بۇعاتتالادى. كەيىن ۇشجاقتى كەلىسىم بويىنشا 805 ملن تەڭگە تولەنگەن سوڭ، شوتتار قايتا اشىلعان.

"قالعان 1,5 ملرد تەڭگە مولشەرىندەگى قارىزدى جىلىتۋ ماۋسىمى باستالعانعا دەيىن وتەۋ جوسپارلانعان. وسىعان بايلانىستى ءبىز ايماقتىڭ جەتەكشىلىگىنەن وسى ماسەلەنى باقىلاۋعا الۋدى سۇرايمىز، ويتكەنى التى ايدان بەرى جەو جۇمىسى توقتاتىلعان", - دەدى قانات بوزىمباەۆ.

دەگەنمەن ءمينيستردىڭ سوزىنشە، ەلدەگى گاز تاسىمالداۋ ينفراقۇرىلىمىنىڭ وبەكتىلەرى تۇراقتى رەجيمدە جۇمىس ىستەيدى جانە وبەكتىلەردە تەحنيكالىق قىزمەت كورسەتۋ كەستەلەرگە ساي جۇزەگە اسىرىلادى. سونداي-اق، ءمينيستردىڭ سوزىنە سەنسەك، قازاقستاننىڭ ەنەرگەتيكالىق كاسىپورىندارىنىڭ كۇزگى-قىسقى كەزەڭگە دايىندىق جۇمىستارى اياقتالۋعا جاقىن.

بۇدان بولەك، ۆەدومستۆو باسشىسى 2017 جىلى 10 ەنەرگوبلوكتى، 61 ەنەرگەتيكالىق قازاندىقتى جانە 49 تۋربينانى جوندەۋ جوسپارلانعانىن اتاپ ءوتتى. 2017 جىلعى قىركۇيەك ايىنىڭ باسىندا 4 ەنەرگوبلوكتا، 28 قازاندىقتا جانە 22 تۋربينادا جۇمىس اياقتالعان. 4 ەنەرگوبلوكتا، 30 قازاندىقتا جانە 21 تۋربينادا جوندەۋدىڭ ءارتۇرلى كەزەڭىندە جۇمىستار ءالى اياقتالماعان.

“The Qazaq Times”