ۇلىبريتانيانىڭ پرەمەر-ءمينيسترى تەرەزا مەي جاپونياعا رەسمي ساپارى بارىسىندا سولتۇستىك كورەيانىڭ زىمىران شابۋىلىنان كەيىن ەلدە وتكەن جابىق اسكەري كەزدەسۋگە قاتىستى. بۇل تۋرالى APF اقپاراتتىق اگەنتتىگى جازدى. 

رەسمي اقپاراتقا قاراعاندا، تەرەزا مەي جاپونيانىڭ جابىق قاۋىپسىزدىك كەڭەسىنە قاتىسىپ وتىرعان ەكىنشى شەتەلدىك كوشباسشى. وعان دەيىن، 2014 جىلى مۇنداي جوعارى دەڭگەيدەگى جابىق كەزدەسۋگە قاتىسۋ قۇرمەتىنە اۋستراليانىڭ سول كەزدەگى پرەمەر-ءمينيسترى توني ەببوت يە بولعان ەدى.

جاپونيا ۇكىمەتىنىڭ وكىلى ەسيحيدە سۋگا تەرەزا مەيدىڭ اتالعان شاراعا قاتىسۋى ۇلىبريتانيا مەن جاپونيا اراسىنداعى ديپلوماتيالىق قارىم-قاتىناستاردىڭ نىعايا تۇسۋىنە سەبەپكەر بولدى دەپ ەسەپتەيدى. ەسيحيدە سۋگا جۋرناليستەرگە بەرگەن سۇحباتى كەزىندە تەرەزا مەيدىڭ جاپونياداعى قاۋىپسىزدىك پەن ديپلوماتيا بويىنشا شەشىمدەر قابىلداناتىن باسقوسۋعا شاقىرتۋ العانىن جەتكىزدى.

2013 جىلى قۇرىلعان قاۋىپسىزدىك كەڭەسى جاپونيانىڭ پرەمەر-ءمينيسترى سيندزو ابە مەن ماڭىزدى مينيسترلەردەن تۇرادى.

قازىر ۇلىبريتانيا بۇۇ ارقىلى سولتۇستىك كورەيانىڭ گاستاربايتەرلەرىن رەسەي، قىتاي سياقتى وزگە مەملەكەتتەرگە جۇمىس ىستەۋگە جىبەرۋگە تىيىم سالاتىن جاڭا سانكتسيالار ەنگىزۋگە كۇش سالىپ وتىر.

جاپونيانىڭ قورعانىس ءمينيسترى تەرەزا مەيعا ەلدەگى اقش-تىڭ اسكەري بازاسىن تانىستىرعاننان كەيىن، وسى جىلى زىمىران شابۋىلىنا قارسى تەحنولوگيالاردى دامىتۋعا مەملەكەتتەن ەڭ ۇلكەن بيۋدجەت قاراستىرىلاتىنىن جەتكىزدى.

ەرتەڭ تەرەزا مەي سيندزو ابەمەن بىرگە ءباسپاسوز-كونفەرەنتسياسىن وتكىزىپ، يمپەراتور احيكيتومەن كەزدەسەدى.

“The Qazaq Times”