فوتو: ريا نوۆوستي.

قىرعىزستاندا تاۋەلسىزدىك كۇنى لاڭكەستىك شابۋىل جاساماق بولعان تەررورلىق توپتىڭ كوزى جويىلدى، دەپ حابارلايدى ca-news.org اقپارات كوزى.

قىرعىزستان ۇلتتىق قاۋىپسىزدىك كوميتەتىنىڭ مالىمەتىنشە، لاڭكەستىك توپتى ۇستاۋعا بايلانىستى ارنايى وپەراتسيا تامىزدىڭ 28-نەن 29-نا قاراعان ءتۇنى شۋ وبلىسىنىڭ جايىل اۋدانىندا بولعان. ارنايى وپەراتسيا بارىسىندا ۇقك-نىڭ ءوز ەرىكتەرىمەن بەرىلۋگە بايلانىستى ۇسىنىسىنا تەررورلىق توپ مۇشەلەرى وق جاۋدىرۋمەن جاۋاپ بەرگەن. وسىدان كەيىن «الفا» ارنايى جاساعى لاڭكەستىك توپ مۇشەلەرىنە قارسى كۇش قولدانعان. سالدارىنان تەررورلىق توپتىڭ ەكى مۇشەسى وققا ۇشىپ، بىرەۋى جاراقات العان. وقيعا ورىنىن تەكسەرۋ بارىسىندا ۇقك قىزمەتكەرلەرى رگد-5 گراناتاسىن، «ماكاروۆ» تاپانشاسىن جانە بىرنەشە پىشاق تاپقان.

فوتو: ca-news.org

بۇعان دەيىن بىشكەك قالاسىندا ۇقك مەن ءىىد قىزمەتكەرلەرى بىرىگىپ تەررورلىق توپتىڭ تاعى ءبىر مۇشەسى م.ب ەسىمدى ازاماتتى ۇستاعان. تەكسەرۋ بارىسىندا ونىڭ اۆتوكولىگىنەن رەۆولۆەر، ءار ءتۇرلى كاليبرداعى وقتار مەن «ماكاروۆ» تاپانشاسىنىڭ وق سالعىشى تاركىلەنگەن. بۇدان بولەك "تەررورلىق ۇيىمعا كومەكتەستى" دەگەن كۇدىكپەن 1960 جانە 1985 جىلدارى دۇنيەگە كەلگەن ك.و جانە ت.ا ەسىمدى ازاماتتار ۇستالىپ، قاماۋعا الىنعان.

قازىرگى تاڭدا كۇدىكتىلەر ۇستىنەن «تەرروريزم» بابى بويىنشا قىلمىستىق ءىس قوزعالعان.

“The Qazaq Times”