قازاق-قىرعىز شەكاراسىن زاڭسىز وتپەك بولعان قارۋلى قىرعىز ازاماتى ۇستالدى، دەپ حابارلايدى الماتى وبلىسىنىڭ ىشكى ىستەر دەپارتامەنتىنىڭ ءباسپاسوز قىزمەتى.

ۆەدومستۆو تاراتقان مالىمەت بويىنشا، 41 جاستاعى قىرعىزستان ازاماتىن تامىزدىڭ 16-سى كۇنى الماتى وبلىسىنا قاراستى رايىمبەك اۋدانىنىڭ شەكاراشىلارى ۇستاعان. تەكسەرۋ كەزىندە شەكارادان زاڭسىز وتكەن ازاماتتان 7,62 ميليمەترلىك «تيگر» قارۋى تاركىلەنگەن.

تەرگەۋ بارىسىندا قىرعىزستان ازاماتى جوعالعان مالىن ىزدەپ ءجۇرىپ قازاقستان شەكاراسىنا اداسىپ ءوتىپ كەتكەندىگىن ايتقان. قازىرگى تاڭدا ونىڭ ۇستىنەن قىلمىستىق ءىس قوزعالعان.

ەستەرىڭىزگە سالايىق، بۇعان دەيىن تامىزدىڭ 12-ءسى كۇنى جامبىل وبىلىسىندا قازاقستان مەن قىرعىزستان شەكتەسەتىن «جاسوركەن» زاستاۆاسىندا زاڭعا باعىنباي، شەكارا سىمدارىن بۇزىپ مال ايداپ وتپەك بولعان 15 ادامعا شەكاراشىلار وق اتىپ، سالدارىنان ءبىر ادام كوز جۇمعان بولاتىن.

“The Qazaq Times”