ساۋد ارابياسى بيلىگىنىڭ رەسمي وكىلدەرى مەن بۇقارالىق اقپارات قۇرالدارىنىڭ مالىمەتىنشە، ارار قالاسى ماڭىنداعى يراكپەن اراداعى شەكارا 1990 جىلدان بەرى العاش رەت اشىلادى. وسى قاقپا ارقىلى ەكى ەل اراسىندا جۇك تاسىمالى جۇزەگە اسىرىلماق. بۇل تۋرالى ءال-جازيرا (Al-Jazeera) اقپاراتتىق اگەنتتىگى جازدى.

ساۋد ارابياسى مەن يراك اراسىنداعى ديپلوماتيالىق بايلانىستاردىڭ ۇزىلۋىنە ساددام حۋسەيننىڭ ءوز اسكەرىن كۋۆەيتكە الىپ كىرۋى سەبەپ بولعان. وسىدان كەيىن ۇزىلگەن قوس ەلدىڭ قارىم-قاتىناسى 2015 جىلى ساۋد ارابياسىنىڭ ەلشىلىگى باعداد قالاسىندا اراعا 25 جىل سالىپ، قايتا جۇمىسىن باستاعان كەزدە جاندانا ءتۇستى.

يراك شيتەرىنىڭ باسشىسى مۇقتادا-اس-سادردىڭ ايتۋىنشا، ساۋد ارابياسى شيتتەر تۇراتىن وڭتۇستىك اۋداندارعا ينۆەستيتسيا قۇيۋدىڭ جولدارىن قاراستىرىپ جاتىر جانە قازىردىڭ وزىندە يراكقا كومەك رەتىندە 10 ملن اقش دوللارىن بەرگەن.

مەككە باسىلىمى يراك مۇسىلماندارىنا جىلىنا ءبىر رەت قاجىلىققا عانا شەكارا اسۋعا رۇقسات ەتىلەتىن، ەندى حالىقتىڭ ەكى ارادا قاتىناۋى جەڭىلدەي تۇسەدى دەپ جازدى.

يراكتىڭ وڭتۇستىك-باتىسىنداعى انبار پروۆينتسياسىنىڭ باسشىسى سۋحاب-ءال-ءرابي: «بۇل ساۋد ارابياسى مەن يراكتىڭ بولاشاقتاعى ارىپتەستىگىنە جاقسى باستاما»، - دەپ باعا بەردى.

يراك پەن ساۋد ارابياسىنىڭ وڭىردەگى يراننىڭ اسكەري جانە ساياسي قۋاتىنىڭ ارتۋىنا بايلانىستى كۇش بىرىكتىرۋى زاڭدى قۇبىلىس. ەكى تاراپ تا كورشىلەرىنىڭ كۇش الىپ، وڭىردە ءوز ساياساتىن جۇرگىزە باستاعانىن قالامايدى.

“The Qazaq Times”