يران ۇشقىشسىز ۇشاعى پارسى شىعاناعىندا امەريكالىق جويعىش ۇشاقتى قۋالادى

شەتەلدىك اقپارات كوزدەرى اقش جوعارى لاۋازىمدىلارىنىڭ سوزىنە سىلتەمە بەرە وتىرىپ، اقش-تىڭ جويعىش ۇشاعى پارسى شىعاناعىندا يراننىڭ ۇشقىشسىز ۇشاعىنىڭ قۋدالاۋىنا ۇشىراعانىن حابارلادى. بۇل تۋرالى قىتايلىق «شينلاڭ» اقپاراتتىق اگەنتتىگى ءوز سايتىندا جازدى.

اقش اۋە كۇشتەرىنىڭ F/A-18E جويعىش ۇشاعىنىڭ پارسى شىعاناعىنداعى نيميتس اۆياماتكاسىنا قونۋعا دايىندالعان كەزىندە، كەنەتتەن يراننىڭ قارۋلانباعان دروننىڭ قۋعىنىنا ۇشىراعان. ەكى ەل ۇشاعى ءبىر-بىرىنە 31 مەتر ارالىققا دەيىن جاقىنداپ كەلگەن. ءتىپتى سوقتىعىسا جازداعان.

Reuters اگەنتتىگىنىڭ 8 تامىزداعى حابارىندا، اقش قورعانىس وكىلدەرىنىڭ اتىن اتاعىسى كەلمەگەن ءبىر لاۋازىمدىسى وقيعانى: "اقش جويعىش ۇشاعى ۇشاق تاسىمالداۋشى كەمەگە (اۆياماتكا) قونۋعا دايىندالعان كەزدە، سوڭىنان يراندىق ۇشقىشسىز ۇشاق ىلەسە ۇشىپ جاقىنداعان. اقش جاق راديو سيگنالى ارقىلى ەسكەرتۋ بەرسە دە يران درونى قاۋىپتى جاعدايدا جاقىنداي تۇسكەن. اقش ۇشاعى قونۋ وپەراتسياسىن رۇقساتسىز شۇعىل تۇردە جۇزەگە اسىرۋعا ءماجبۇر بولعان", - دەپ تۇسىندىرگەن.

يران مەن اقش-تىڭ سوعىس كەمەلەرى مەن بارلاۋشى ۇشاقتارى پارسى شىعاناعىندا سان رەت جۇزدەسىپ قالادى. الايدا، يران درونىنىڭ اقش جويعىش ۇشاعىنا مۇنشالىق جاقىن كەلۋى العاش رەت. ونىڭ ۇستىنە بۇل جويعىش ۇشاقتىڭ كەمەگە قونۋى كەزىندە ورىن العان.

2015 جىلى اقش باس تارتقان 6 ەلمەن يادرولىق باعدارلامانى توقتاتۋ كەلىسىمىنە كەلدى. يران ءوزىنىڭ يادرولىق باعدارلاماسىن توقتاتۋدىڭ ورنىنا، باتىس ەلدەرىنىڭ ەكونوميكالىق قىسىمىن جويۋمەن الماستىرۋدى ءۇمىت ەتتى. الايدا، ترامپ اقش پرەزيدەنتتىگىنە كەلگەلى بەرى، ورتا-شىعىستاعى اقش ساياساتى ءتىپتى تارىلىپ، يراندى وقشاۋلاۋ ساياساتىن جەدەلدەتتى. ۋاشينگتوننىڭ قاراۋىنشا، يراننىڭ بالليستيكالىق زىمىراندارى اقش-تىڭ كەيبىر يەلىكتى مۇددەلەرىنە قاۋىپ توندىرەدى. ال، يران جاق بالليستيكالىق زىمىرانداردى دامىتۋ مەملەكەتتىك قاۋىپسىزدىكتىڭ ماڭىزدى ءبىر باعىتى. سونداي-اق، بۇل باعدارلاما كەلىسىمدە قامتىلماعان.

18 شىلدە كۇنى، امەريكا قۇراما شتاتتارى يرانعا قارسى جاڭا سانكتسيالار جاريالاعاننان كەيىن، يران سىرتقى ىستەر مينيسترلىگى مالىمدەمە جاساپ، اقش سانكتسياسىن ورىنسىز دەپ ايىپتادى. ءارى ۋاشينگتوننىڭ سانكتسيالارى سونشالىق ماعىناسىز جانە تۇككە تۇرعىسىز دەپ سىنادى. ونىڭ قايتارىم جاۋابى رەتىندە يران جاقتا اقش-تىڭ كەيبىر تۇلعالارىنا سانكتسيا سالدى.

“The Qazaq Times”