ۆەنەسۋەلا اسكەري بازاعا شابۋىل جاساعان ازاماتتاردى ىزدەستىرە باستادى

ۆەنەسۋەلا پرەزيدەنتى نيكولاس مادۋرو ەلدەگى اسكەري بازاعا شابۋىل جاساعان 10 ادامعا ىزدەۋ سالىنعانىن حابارلادى. ونىڭ اقپاراتىنشا، ۆەنەسۋەلانىڭ سولتۇستىك-باتىسىندا ورنالاسقان ۆالەنسيا قالاسىنداعى اسكەري بازاعا جاسالعان شابۋىلعا 20-عا جۋىق ادام قاتىسقان. ولاردىڭ ەكەۋى وقيعا ورنىندا كوز جۇمىپ، بىرەۋى جارالانعان، قالعان جەتەۋى اباقتىعا جابىلدى. ەندى قولدارىنا قارۋ ۇستاپ، بەلگىسىز باعىتتا ءىزىن سۋىتقان تاعى 10 ادامعا ىزدەۋ جاريالاندى.

بۇدان بۇرىن الەۋمەتتىك جەلىلەردە بىرنەشە ەر ازاماتتاردىڭ : «ءبىز تيرانياعا قارسى باس كوتەرەمىز» دەگەن بەينەجازبالارى جاريالانعان بولاتىن. نيكولاس مادۋرو ۇلتتىق ارنادان حالىققا جولداعان ۇندەۋىندە ەل اسكەرىنە جەدەل ارەكەت ەتكەندەرى ءۇشىن العىس ءبىلدىرىپ، بولعان وقيعانى «تەررورلىق اكت» دەپ اتادى. سونداي-اق مەملەكەت باسشىسى ىزدەۋدەگى قىلمىسكەرلەردى مىندەتتى تۇردە تاۋىپ، ءتيىستى جازاسىن تارتقىزۋعا ۋادە بەردى.

رەسمي دەرەك كوزدەرىنە سۇيەنسەك، شابۋىلشىلاردىڭ ءبىرى بۇرىنعى لەيتەنانت، ال قالعاندارى اسكەري فورما كيگەن بەيبىت تۇرعىندار بولعان. BBC اقپاراتتىق اگەنتتىگى جۋرناليستەرى سوڭعى ءتورت اي بويى ەلدە جالعاسىپ كەلە جاتقان حالىقتىق كوتەرىلىستەر كەزىندە، ەل اسكەرى پرەزيدەنت نيكولاس مادۋروعا ادالدىقتارىن بىرنەشە رەت دالەلدەگەندەرىن ايتادى.

سونىمەن قاتار: «دەگەنمەن، اسكەريلەر دە قاراپايىم ادامدار. ولاردىڭ دا جانۇياسى بار جانە ەلدەگى بولعان وزگەرىستەر مەن داعدارىستار اسكەريلەردىڭ وتباسىلارىنا اسەر ەتەتىنى ءسوزسىز. سوندىقتان، سوڭعى كەزدەرى اسكەريلەردىڭ اراسىندا كەرەعار كوڭىل كۇي قالىپتاسىپ كەلە جاتىر»، - دەپ مالىمدەگەن BBC اقپاراتتىق اگەنتتىگى ۆالەنسيادا بولعان وقيعاعا قاتىسقانداردىڭ قاتارىندا ءبىر عانا اسكەري بولدى دەگەنگە كۇمان كەلتىرەدى.

ولاردىڭ پىكىرىنشە، 20 شابۋىلشىنىڭ باسىم كوپشىلىگى اسكەريلەر بولعانىنا قاراماستان، نيكولاس مادۋرو ۇكىمەتى بۇل جايتتى جاسىرىپ وتىرۋى مۇمكىن.

“The Qazaq Times”