فوتو: turkystan.kz

2017 جىلعى 1 شىلدەدەگى جاعداي بويىنشا زەينەتاقى جيناعىنىڭ جالپى سوماسى 7,14 ترلن. تەڭگەنى قۇرادى، بۇل جىل باسىنداعى سومادان 450 ملرد تەڭگەگە (نەمەسە 6,3%-عا) كوبىرەك. بۇل تۋرالى قوردىڭ ءباسپاسوز قىزمەتى حابارلادى.

"بۇكىل زەينەتاقى جيناعىنىڭ باسىم بولىگى، ياعني 98,3%-ى مىندەتتى زەينەتاقى جارناسى ەسەبىنەن قۇرالدى. وسى تۇستا 2017 جىلدىڭ ءبىرىنشى جارتىسىنداعى ءتۇسىمنىڭ جالپى سوماسى 364,9 ملرد. تەڭگەنى قۇرادى.الدىڭعى جىلعى كورسەتكىشپەن سالىستىرار بولساق، وتكەن جىلدىڭ تۋرا وسىنداي كەزەڭىندە زەينەتاقى جارناسى 221,8 ملرد. تەڭگەنى قۇراعان، ياعني بۇل سوما 64,5%-عا ءوسىپ وتىر", دەلىنگەن ءباسپاسوز حابارلاماسىندا.

2017 جىلدىڭ 6 ايى ىشىندە سالىمشىلارعا (الۋشىلارعا) تيەسىلى 201,3 مىڭ جەكە زەينەتاقى شوتى  (جزش) اشىلدى. ۇستىمىزدەگى جىلدىڭ 1 شىلدەسىندەگى جاعدايعا سايكەس شارتتاردىڭ بارلىعى بويىنشا اشىلعان جزش جالپى سانى 10,07 ملن. بىرلىكتى قۇرادى.

بجزق-نىڭ 2017 جىلدىڭ 6 ايى ىشىندە تولەگەن زەينەتاقى تولەمدەرىنىڭ سوماسى  121,25 ملرد تەڭگە قۇرادى، وتكەن جىلدىڭ تۋرا وسىنداي كەزەڭىندە بۇل سوما 96,59 ملرد بولعان، ياعني ءوسىم 25,5%-دى قۇرادى. وسى بۇكىل سومانىڭ ىشىندەگى 86,6 ملرد. تەڭگە (نەمەسە 71,4%-ى) زەينەتاقى جاسىنا جەتكەن كەزدە تولەنەتىن زەينەتاقى بولسا، 14,7 ملرد. تەڭگە (نەمەسە 12,1%) ساقتاندىرۋ ۇيىمدارىنا اۋدارىلعان زەينەتاقى جيناقتارى، 9,7 ملرد. تەڭگە (نەمەسە 8%) شەتەلگە تۇراقتى تۇرۋعا كەتۋگە بايلانىستى جاسالعان تولەمدەر، 10,3 ملرد. تەڭگە (نەمەسە 8,5%) باسقا دا بىرجولعى تولەمدەر (مۇراگەرلەرگە جانە جەرلەۋ ءۇشىن) بولىپ تابىلادى.

2017 جىلدىڭ ءبىرىنشى جارتىسىنداعى تازا ينۆەستيتسيالىق تابىس سوماسى 205,69 ملرد. تەڭگە قۇرادى. ءسويتىپ 2017 جىلدىڭ 1 قاڭتارىنان باستاپ 30 ماۋسىمى ارالىعىنداعى كەزەڭدە سالىمشىلاردىڭ (الۋشىلاردىڭ) شوتىنا ۇلەستىرىلگەن بجزق زەينەتاقى اكتيۆتەرىنىڭ تابىستىلىعى ينفلياتسيانىڭ 3,7%-عا تەڭ دەڭگەيىندە 3,01%-دى قۇراعان.

2017 جىلدىڭ 6 ايى ىشىندە بجزق-نىڭ جەكە قىزمەت كورسەتۋ ورتالىقتارىندا بارلىعى 2,9 ملن-عا جۋىق وپەراتسيا جۇرگىزىلدى، ياعني بجزق كەڭسەلەرىندە تۇرعىندارعا ارناپ كۇنىنە 25 مىڭعا جۋىق قىزمەت (وپەراتسيا) كورسەتىلەدى.

ايتا كەتەيىك، 2017 جىلدىڭ 1 مامىرىنداعى جاعداي بويىنشا بجزق پروبلەمالى اكتيۆتەرىنىڭ كولەمى 40,5 ملرد تەڭگەنى قۇراعان جانە ول 21 ەميتەنتكە تيەسىلى ەكەنىن مالىمدەگەن.

“The Qazaq Times”