«التىن وردا» بازارى ماڭىنداعى جول كەڭەيەدى

«الماتى - بىشكەك» اۆتوجولىنىڭ 786-790 شاقىرىم ۋچاسكەسى، ياعني «التىن وردا» بازارى ماڭىنداعى 3,8 شاقىرىمدىق جول كەڭەيتىلەدى. بۇل تۋرالى الماتى وبلىسى اكىمدىگىنىڭ ءباسپاسوز قىزمەتى حابارلادى.

الماتى وبلىسى اكىمىنىڭ ورىنباسارى ايداربەك بايجانوۆتىڭ مالىمەتىنشە، وسى ماڭداعى كولىك كەپتەلىسىن شەشۋ ءۇشىن وبلىس اكىمدىگىنىڭ ۇسىنىسىمەن ۇكىمەت تاراپىنان قولداۋ تاپقان  جوبا 2017 جىلى جۇزەگە اسىرىلا باستايدى. كۇردەلى جوندەۋ بارىسىندا جول ءۇستى كوپىرلەرى مەن جول بۇرىلىستارىن سالۋ قاراستىرىلماق.

الماتى وبلىسى اكىمىنىڭ ورىنباسارى ايداربەك بايجانوۆ. فوتو: zhetysu.gov.kz

ال «كازاۆتوجول» مەكەمەسىنىڭ الماتى وبلىستىق فيليالى ديرەكتورىنىڭ ورىنباسارى نۇرحات اقىلتاەۆتىڭ ايتۋىنشا، «التىن وردا» بازارى ماڭىنداعى اۆتوجول ارقىلى تاۋلىگىنە 50 مىڭ اۆتوكولىك جۇرەدى. مۇنداعى كەپتەلىس ماسەلەسىن شەشۋ ماقساتىندا  جولدىڭ 16-19 شاقىرىم ارالىعى 8 جانە 10 جولاقتى بولماق. ونىڭ ەكى جولاعى ترانزيتتىك كولىكتەرگە ارنالسا، ەكى جولاعى جەرگىلىكتى ماڭعا جۇرەتىن كولىكتەرگە، ال ءبىر جولاعى قوعامدىق كولىكتەرگە ارنالادى. 16-شى شاقىرىمدا بۇرىلىس ەستاكاداسى قاراستىرىلادى.

جوبانىڭ ەكىنشى كەزەڭىندە 18 مىڭ تۇرعىنى بار «اسىل ارمان» تك تۇرعىندارىنىڭ ءوتىنىشى بويىنشا اتالعان كەشەننەن قالاعا بۇرىلاتىن «ترۋبا» ءتيپتى جەر ءۇستى جولى سالىنسا، سونىمەن قاتار رايىمبەك اۋىلى تۇسىندا تاعى ءبىر، جوبا بويىنشا ءتورتىنشى جەر ءۇستى جولى قاراستىرىلاتىن بولادى. ەكى كەزەڭىنىڭ دە جوباسىن «استاناسترويپروەكتسەرۆيس-م» جشس دايىنداۋدا.

جوبانى تولىق جۇزەگە اسىرۋدىڭ الدىن الا ەسەپتەۋ بويىنشا قۇنى 12 ملرد تەڭگەگە جۋىق دەپ جوبالانىپ وتىر. بيىلعى جىلعا 800 ملن تەڭگە بولىنگەن. كۇردەلى جوندەۋ جۇمىستارى 2019 جىلى تولىعىمەن اياقتالادى دەپ جوسپارلانعان.

ايتا كەتەيىك، قازىرگى كەزدە الماتى قالاسىنا سىرتتان بەيرەسمي اقپارات بويىنشا 300 مىڭنان اسا كولىك كەلەدى. ال بۇل قالاداعى كەپتەلىستى ارتتىرماسا ازايتا قويمايدى. تيىسىنشە، قالادا سىرتتان كەلەتىن كولىكتەردى قالدىرىپ، قاجەتتى جەرلەرگە باسقا قوعامدىق كولىكتەرمەن قاتىناۋعا جاعداي جاسالماعان. تەك جولدى كەڭەيتە بەرۋدەن اسىپ جاتقان جوقپىز.

“The Qazaq Times”