فوتو: centre1

وزبەكستاندا بۇقارا قالاسىنىڭ ورتالىق كوشەلەرىنىڭ بىرىنە يسلام كارىموۆتىڭ اتى بەرىلدى.

يسلام كارىموۆتىڭ اتى جازىلعان تاقتايشالار بۇقارا قالاسىنىڭ ورتالىق كوشەسىنە شىلدە ايىنىڭ ورتاسىندا قويىلا باستاعان. بۇقارا ورتالىعىنان كارىموۆتىڭ اتىنا كوشە بەرۋگە بايلانىستى قۇجاتتى قاڭتاردىڭ 29-ى كۇنى ەل پرەزيدەنتى شاۆكات ميرزيەەۆتىڭ شەشىمى بويىنشا قالا اكىمى ۋكتام بارنوەۆ قابىلداعان.

بۇقارا قالاسىنىڭ ورتالىق كوشەلەرىنىڭ بىرىنە يسلام كارىموۆتىڭ اتىن بەرۋدى شاۆكات ميرزيەەۆ ناۋرىز ايىندا بۇقارا وبلىسىنا ىسساپارمەن كەلگەندە ۇسىنعان. ول كارىموۆ كوشەسى اتىنا زاتى ساي بولۋى كەرەكتىگىن ايتىپ، قالا باسشىلىعىنا ءتيىستى تاپسىرمالار بەرگەن.

وسىعان بايلانىستى شاھار اكىمشىلىگى كارىموۆ كوشەسىن ۇزارتۋ ماقساتىندا «ديلكۋشو» بازارىن بۇزىپ تاستاعان. ناتيجەسىندە 600-دەن استام كاسىپكەر جۇمىسسىز قالىپ، ەل بيلىگىنە ماسەلەنى شەشۋلەرىن سۇراپ اشىق حات جولاعان.

فوتو: centre1

بۇقارا قالاسى اكىمشىلىگىنىڭ مالىمەتىنشە، جاقىن كۇندەرى وبلىس اكىم وسى ماسەلە بويىنشا حالىقپەن كەزدەسۋ وتكىزەتىن بولادى.

ەستەرىڭىزگە سالايىق، جاقىندا قازاقستاندا دا بۇعان دەيىن ازاماتتىق بەلسەندىلىگىمەن ەش جەردە كوزگە تۇسپەگەن دۋمان بازاربەكوۆ ەسىمدى زاڭگەر الماتى قالاسىنداعى فۋرمانوۆ كوشەسىنە نۇرسۇلتان نازارباەۆتىڭ اتىن بەرۋ كەرەك دەپ قالا اكىمىنە حات جازعان ەدى. شاھار باسشىسى باۋىرجان بايبەك مىرزا زاڭگەردىڭ وتىنىشىنە قانداي جاۋاپ بەرەتىنىن الداعى 10 كۇن ىشىندە بىلەتىن بولامىز.

“The Qazaq Times”