دوللار 450 تەڭگەگە دەيىن كوتەرىلۋى مۇمكىن بە؟

Halyk Finance ساراپشىلارى "دوللار باعامى 420-450 تەڭگەگە دەيىن قىمباتتاۋى مۇمىكن" دەپ ايتقانداردىڭ مالىمدەمەسىن جاۋاپسىزدىق دەدى.

سوڭعى ۋاقىتتا تەڭگەنىڭ بىردەن قۇلدىراپ كەتۋى مۇمكىن ەكەنى جونىندە قاۋەسەتتەر ءجيى تارالا باستادى. سەبەبى الماتىدا وتكەن كونفەرەنتسيالاردىڭ بىرىندە رەسەيلىك كومپانيالاردىڭ وكىلى، فورەكس-ديلەر "Expo 2017 Astana International ءىس-شاراسى اياقتالعاننان كەيىن قازاقستانننىڭ ۇلتتىق ۆاليۋتاسى قۇنسىزدانادى. جىل سوڭىنا دەيىن كۋرس 420-450 تەڭگە شاماسىندا بولۋى مۇمكىن. قازىرگى كەزدەگى تەڭگەنىڭ تۇراقتى بولىپ تۇرعانى ساياسي-ەكونوميكالىق فاكتورعا بايلانىستى" دەگەن پىكىر ايتقان.

ال Halyk Finance ينۆەستيتسيالىق بانكىنىڭ باسقارما مۇشەسى مۇرات تەمىرحانوۆتىڭ ايتۋىنشا، قوعامدا تارالعان مۇنداي مالىمدەمە جاۋاپسىزدىقتىڭ بەلگىسى، ءتىپتى،  تەڭگەنى "جاساندى" تۇردە قۇلدىراتۋعا نيەتتىلەر بولۋى مۇمكىن.

"قازىرگى كەزدە ۇلتتىق ۆاليۋتا ەركىن اينالىمعا جىبەرىلگەن جانە كۋرس تۇراقتى. ۇلتتىق بانك پەن ۇكىمەت تاراپىنان اقش دوللارىنا قاتىستى بولىپ جاتقان فيكساتسيا بەلگىلەرى جوق. قازىر مەملەكەت تەڭگە ەركىن اينالىمعا جىبەرىلگەننەن كەيىن كۋرستى ۇستاپ تۇرۋ ءۇشىن ەشقانداي قارجى جۇمسامايدى. تەڭگە كۋرسىنىڭ وزگەرۋىنە اسەر ەتەتىن تەك ەكى عانا فاكتور بار - ول مۇناي باعاسى مەن دوللارعا قاتىستى رۋبل باعامى", - دەيدى ول.

Halyk Finance ساراپشىسىنىڭ سوزىنشە، مۇناي باعاسى 40 دوللارعا دەيىن قۇلدىراسا جانە ول ۇزاق ۋاقىتقا سوزىلاتىن بولسا دوللار باعامى 340-360 تەڭگە كولەمىندە بولادى. سونداي-اق ول "قازىرگى ۋاقىتتا تەڭگەنىڭ رۋبلگە قاتىستى باعامى نارىققا ساي جانە ول ءبىر جىل كولەمىندە ساقتالادى" دەپ ەسەپتەيدى.

ايتا كەتەيىك، 2015 جىلدىڭ 20 تامىزىندا ۇلتتىق ۆاليۋتا ەركىن اينالىمعا جىبەرىلگەن. وسىدان كەيىن دوللار باعامى قاراشا ايىنا تامان 280 تەڭگەگە دەيىن كوتەرىلدى. ال ۇلتتىق بانك توراعاسى قىزمەتىنە دانيار اقىشەۆ كەلگەن سوڭ دوللاردىڭ كۋرسى 380 تەڭگەگە دەيىن كوتەرىلدى. ال 2017 جىلدىڭ قىسىنان باستاپ اقش ۆاليۋتاسى ءبىراز ارزاندادى.

“The Qazaq Times”