اقش قىتاي ەكونوميكاسىن قاتاڭ ايىپتادى

اقش پەن قىتاي ساۋدا قاقتىعىسى ءسال عانا باسەڭدەي قالعان ساتتە، اقش تارابى تاعى ءبىر داۋدىڭ ۇشىعىن ورتاعا سالدى. وتكەن اپتانىڭ سوڭىندا اقش-تىڭ قازىنا دەپارتامەنتى جاساعان مالىمدەمەدە، قىتاي ەكونوميكاسىنىڭ باعىتىن قاتاڭ سىنعا الدى. مالىمدەمەدە قىتاي ەكونوميكاسى بارعان سايىن نارىقتىق ەمەس باعىتقا دامىپ بارا جاتقانى، بۇنىڭ ونىڭ ساۋدا سەرىكتەرى مەن جاھاندىق ەكونوميكاعا  قاۋىپ-قاتەرى بارعان سايىن ارتىپ كەلە جاتقانى ايتىلدى. بۇل تۋرالى VOA باسىلىمى حابارلادى.

اقش قازىنا دەپارتامەنتى ءار التى اي سايىن ءوزىنىڭ ەڭ نەگىزگى ساۋدا سەرىكتەرىنە «الەمدىك ەكونوميكا جانە ۆاليۋتا باعامى ساياساتى تۋرالى ەسەپ» بەرەدى جانە بۇل ەسەپ كونگرەسكە ۇسىنىلادى.

بۇل جولى دا قىتاي ۆاليۋتالىق مانيپۋلياتسيالار تىزىمىنە ەنگىزىلمەدى. بۇل ارنايى باقىلاۋ تىزىمىنە تەك التى ەل عانا كىرەدى. ەگەر قىتاي ۆاليۋتالىق مانيپۋلياتور رەتىندە كورسەتىلسە، بۇل الداعى ۋاقىتتا قىتاي مەن اقش اراسىنداعى ساۋدا قاتىناسىنىڭ ءتىپتى دە ناشارلاي تۇسەتىنىن بىلدىرەدى.

بۇل رەتكى «الەمدىك ەكونوميكا جانە ۆاليۋتا باعامى ساياساتى جونىندەگى ەسەپ»، ترامپ بيلىككە كەلگەلى بەرى ءۇشىنشى رەت جاسالىپ وتىر. قىتاي وسى ءۇش رەتكى ەسەپتە دە مانيپۋلياتور رەتىندە تانىلمادى.

باياندامادا قىتاي تارابى ەكىجاقتى ساۋدا تەڭسىزدىكتەرىن تۇزەتۋدە ناقتى ناتيجە كورسەتپەگەنىن، بۇل قۇراما شتاتتى قاتتى الاڭداتاتىپ وتىرعانى ايتىلعان. سونداي-اق، باياندامادا قىتايدى ەكىجاقتى تەڭەستىرىلگەن، ءادىل ساۋدا قاتىناسىن ورناتۋعا شاقىردى.

قازىنا دەپارتامەنتى قىتاي ۇكىمەتىن ناقتى شارالار قابىلداۋعا شاقىردى. ايتالىق، اقش ونىمدەرى مەن قىزمەت وتەۋىن اشىق نارىققا شىعارۋ، مەملەكەت تارابىنان ارالاسۋدى قىسقارتۋ، شەتەلدىك كاسىپورىندارعا نارىقتا ۇلكەن ءرول الۋىنا جول بەرۋ قاتارلى.

بىلتىر قازان ايىندا شىعارىلعان الدىنعى ەسەپتە دە الاڭداۋشىلىق بىلدىرەتىنى ايتىلعان. بىراق، كەزەكتى باياندامادا بۇل سوزگە باسىم سالماق بەرىلىپ وتىر.

“The Qazaq Times”