وپەك ەلدەرى مۇناي ءوندىرىسىن قايتا كوبەيتپەك

وپەك ەلدەرىنىڭ مۇناي ءوندىرىسى شىلدە ايىندا تاۋلىگىنە 145 مىڭ باررەلگە دەيىن ۇلعايۋى مۇمكىن. ال بۇل ۇيىم ەلدەرىنىڭ شيكىزات كولەمىن ازايتۋ كەلىسىمىنە بەيجاي قارايتىنىن كورسەتەدى. مۇنداي پىكىردى  Petro-Logistics كونسالتينگتىك كومپانياسى كەلتىرىپ وتىر.

مۇناي ەكسپورتتاۋشى ەلدەر 2018 جىلدىڭ ناۋرىز ايىنا دەيىن شيكىزات ءوندىرىسىن تاۋلىگىنە شامامەن 1,2 ملن باررەلگە دەيىن قىسقارتۋ تۋرالى شەشىمگە كەلگەن ەدى. كەلىسىمدى وپەك جانە وعان مۇشە ەمەس ەلدەر قولداعان بولاتىن.

الايدا كومپانيانىڭ مالىمەتىنشە،  بىرنەشە اپتادان بەرى مۇناي ءوندىرىسى ايتارلىقتاي ارتقان. اسىرەسە ءوندىرىس كولەمىنىڭ ارتۋى ليۆيا مەن نيگەريادا بايقالىپ وتىر. سەبەبى بۇل ەلدەر شيكىزات ءوندىرىسىن قىسقارتۋ كەلىسىمىنەن بوساتىلعان.

سونىمەن Petro-Logistics ديرەكتورى دەنيەل گەربەردىڭ بولجامى بويىنشا، وپەك ەلدەرىنىڭ ءوندىرىسى شىلدە ايىندا تاۋلىگىنە 145 مىڭ باررەلگە دەيىن ارتىپ، ساۋد ارابياسى، بىرىككەن اراب امىرلىگى جانە نيگەرياداعى شيكىزات كولەمىنىڭ كوبەيۋىنە بايلانىستى تاۋلىگىنە 33 ملن باررەلگە جەتۋى مۇمكىن.

ايتا كەتەيىك، ماۋسىم ايىندا وپەك-ءتىڭ قارا التىن ءوندىرىسى تاۋلىگىنە 393 مىڭ باررەلگە ارتىپ، 32,611 ملن باررەلدى قۇراعان.

ەندى وسى كورسەتكىشكە ءمان بەرسەك، وپەك-ءتىڭ كەلىسىمى 2018 جىلدىڭ ناۋرىزىنا دەيىن ماڭىزىن جوعالتۋى مۇمكىن. ءتىپتى قازاقستاننىڭ ءوزى 2017 جىلدىڭ قاڭتار-مامىر ايىندا مۇناي ەكسپورتىنان 10,5 ملرد دوللار تابىس تاپتى. بۇل كورسەتكىش وتكەن جىلدىڭ سايكەس كەزەڭىنە قاراعاندا 43,9 پايىزعا جوعارى بولعان.

“The Qazaq Times”