شەيح تاميم بەن حاماد ال تاني: "كەز-كەلگەن كەلىسسوزدەر كاتاردىڭ تاۋەلسىزدىگىن قۇرمەتتەۋى ءتيىس"

شەيح تاميم بەن حاماد ال تاني كاتاردىڭ ديپلوماتيالىق داعدارىستى شەشۋ ءۇشىن اراب ەلدەرىمەن كەلىسسوزدەرگە دايىن ەكەندىگىن ايتا كەلە: "دەگەنمەن كەز كەلگەن ديالوگ كاتاردىڭ تاۋەلسىزدىگىنە قۇرمەتپەن قاراۋى ءتيىس", - دەپ مالىمدەدى. بۇل تۋرالى ءال-جازيرا (Al-Jazeera) اقپاراتتىق اگەنتتىگى حابارلادى. 

كاتاردىڭ باسشىسى سونداي-اق، مەملەكەت باسىنا تۋعان  قيىن كەزەڭدە ەكونوميكالىق، ديپلوماتيالىق تۇرعىدا قولداۋ كورسەتكەن اقش، تۇركيا مەن گەرمانياعا جانە اراب ەلدەرىمەن اراداعى مەدياتسيالىق قىزمەتى ءۇشىن كۋۆەيتكە  العىس ءبىلدىردى.

ەستەرىڭىزگە سالا كەتەيىك، ساۋد ارابياسى، بىرىككەن اراب امىرلىكتەرى، ەگيپەت مەن باحرەين  كاتاردى تەرروريستىك ۇيىمداردى قارجىلاندىردى دەپ ايىپتاپ، ونىمەن ديپلوماتيالىق قارىم-قاتىناستارىن ۇزگەن ەدى. ديپلوماتيالىق بلوكادادان قۇتىلۋ ءۇشىن كاتارعا 13 ءتۇرلى مىندەتتەمەنى ورىنداۋ جۇكتەلدى. ولاردىڭ قاتارىندا ەلدەگى تۇركيانىڭ اسكەريلەرىن مەملەكەتتەن شىعارۋ، يرانمەن شەكارانى جابۋ، Al-Jazeera تەلەارناسىنىڭ قىزمەتىن توقتاتۋ، ت.ب. تالاپتار بولعان. كاتار بۇل تالاپتار مەملەكەتتىڭ سىرتقى ساياساتتاعى باعدارلارىن جەكە انىقتاۋىنا سالىنىپ وتىرعان شەكتەۋ دەپ قابىلداپ، ۋلتيماتۋمدى  ورىنداۋدان باس تارتقان بولاتىن.

شەيح تاميم بەن حاماد ال تاني ءوز سوزىندە كاتار حالقىنا توزىمدىلىك پەن بەرىكتىك تانىتقاندارى ءۇشىن ريزاشىلىق  بىلدىردى: ء"بىزدىڭ حالقىمىز بۇكىل الەمگە رۋحىنىڭ قانداي مىقتى ەكەندىگىن كورسەتتى. ورىن العان داعدارىس پەن قيىندىقتارعا قاراماستان، ولار وزدەرىن وتە سابىرلى ۇستادى. مەن سىزدەردى ارى قاراي دا بەكەم بولۋعا شاقىرامىن. ءبىز - 2022 جىلى فۋتبولدان الەم چەمپيوناتىن وتكىزەتىن ەلمىز. بۇل ءبىز ءۇشىن الدىن-الا دايىندالعان سىناق بولاتىن جانە ءبىز ونى ويداعىداي تاپسىردىق".

وسىدان بۇرىن كاتاردىڭ مەملەكەتتىك سايتى مەن ۇلتتىق ارناسىنا حاكەرلىك شابۋىل جاسالىپ، ەل بيلىگىنىڭ  تەرروريستىك ۇيىمداردى قارجىلاندىرعانى جونىندە اقپاراتتار جاريالانعان بولاتىن. الەمدىك قاۋىمداستىقتىڭ پىكىرىن وزگەرتۋ ماقساتىندا جاسالعان بۇل ارەكەتكە قارسى اقش-تىڭ مەملەكەتتىك حاتشىسى رەكس تيللەرسون: "كاتاردىڭ بۇكىلالەمدىك تەرروريزم مەن ەكسترەميزمگە قارسى جۇرگىزىپ وتىرعان كۇرەسىن جوعارى باعالايمىز" دەپ، كورشىلەس مەملەكەتتەردى ديپلوماتيالىق بلوكادانى دوعارۋعا شاقىردى.

“The Qazaq Times”