قازاقستان رەسپۋبليكاسى ينۆەستيتسيالار جانە دامۋ ءمينيسترى جەڭىس قاسىمبەك ۇلىبريتانيا بىرىككەن كورولدىگى مەن سولتۇستىك يرلانديانىڭ ساۋدا جانە ينۆەستيتسيالار ءمينيسترى گرەگ حەندسپەن كەزدەستى، دەپ حابارلادى مينيسترلىكتىڭ ءباسپاسوز قىزمەتى. 

مينيسترلىكتىڭ مالىمەتىنشە، ۇلىبريتانيا - تاۋار اينالىمى بويىنشا قازاقستاننىڭ ەڭ ءىرى 10 سەرىكتەسىنىڭ قاتارىنا كىرەدى، سونداي-اق، قازاقستانعا ەڭ كوپ ينۆەستيتسيا اكەلەتىن ۇزدىك التى ەلدىڭ قاتارىندا. ۇلىبريتانيا سوڭعى 12 جىل ىشىندە قازاقستانعا جالپى كولەمى 12,1 ملرد دوللاردى قۇرايتىن تىكەلەي ينۆەستيتسيا سالعان (2005 جىلدان 2017 جىلدىڭ ءبىرىنشى توقسانىنا دەيىنگى كورسەتكىش بويىنشا تىكەلەي ينۆەستيتسيا كولەمى 12 278,2 ملن اقش دوللارىن قۇرايدى). بۇل - قازاقستانعا تارتىلعان جالپى شەتەلدىك ينۆەستيتسيانىڭ 5%-ى.

ال 2017 جىلدىڭ قاڭتار-ءساۋىر ايلارىندا قازاقستان مەن ۇلىبريتانيا اراسىنداعى تاۋار اينالىمى 422,6 ملن اقش دوللارىن قۇرادى. بۇل 2016 جىلدىڭ ءدال وسى كەزەڭىمەن سالىستىرعاندا 26,6%-عا جوعارى (333,7 ملن اقش دوللارى)

سونداي-اق، ەزدەسۋدە قىتاي-قازاقستان-ۇلىبريتانيا اراسىن بايلانىستىراتىن «ۇلى جىبەك جولى» ەكونوميكالىق بەلدەۋىن جۇزەگە اسىرۋدا بىرلەسىپ جۇمىس اتقارۋ ءۇشىن ۇشجاقتى كەلىسىم ورناتۋ ماسەلەسى ءسوز بولدى.

قازىرگى كەزدە قازاقستان تەرريتورياسى ارقىلى قىتاي مەن ەۋروپانىڭ اراسىندا 15 ترانزيتتىك كونتەينەرلىك پويىز جۇرەدى. وتكەن جىلى «قىتاي-ەۋروپا-قىتاي» باعىتىنداعى ترانزيتتىك كونتەينەرلەر تاسىمالى 104,5 مىڭعا جەتىپ، 2015 جىلمەن سالىستىرعاندا ەكى ەسەگە ارتقان (49,9 مىڭ كونتەينەر).